4 herêman ra ver bi Anqarayî de raywanîya 'Edaletî': Wa no zulm peynî bibo 

2022-01-05 14:12:27


	 

	Dîlan Babat - Oznur Deger 

	 

	ENQERE - Keyeyê tepişteyan ê Êlih, Amed, Mêrdîn, Wan, Colêrmêrg, Mêrsîn û Edenî hemverê binpaykerdişê heqê tepişteyan, verê xo dayî anqara û vengdayîşê "Edaletî" kerdî. 

	 

	Hetê keyeyan ra seba tepişteyê nêweşan û tepişteyê ke seba înfazê înan ameyo betalkerdiş nînê veradayîş, Amed û Wan de "Nobeta Edaletî" ameyî destpêkerdiş. Keyeyê tepişteyan ê Êlih, Amed, Mêrdîn, Wan, Colêrmêrg, Mêrsîn û Edenêyî hemverê binpaykerdişê heqê tepişteyan verê xo dayî Anqara û vengdayîşê "Edaletî" kerdî. 4ê çeleyî de tewrê kombîyayîşê Koma Meclîsî yê Partiya Demokratîke ya Şaran (HDP) bî. Dima ra şî serdayîşê Komeleya Heqê Merdiman (ÎHD) û partiya Gelecekî. Keyeyê ke tewrê serdayîşî bî ajansê ma rê qisey kerdî.

	 

	'Ma seba edaletî ameyî...'

	 

	Feleknas Batur seba mêrdeyê xo yê tepişteyî Alî Batur verê xo da Anqara û vat: "Ma ameyî cayê ke edalalet çin o, edalet gêrenê. Ma semedê tepişteyê xo nêweşan ameyî Anqara. Mêrdeyê mi nêweş o û zîndanê Sîlîvrî de yo. Cigêrayîşê  viran ci rê ame ferzkerdişî. Ma seba edaletî ameyî la, ma bi zor meclîs ra dûr fînenê. Ma înan şermezar kenê. Edalet çin o. Tîya tilîliyê ma sey sîleh ameyî vînayîş. La ma do têkoşîn bikerê û waştişê xo her tim bîyarê ziwan. Mêrdeyê mi 5 serrî yo tepişte yo û hema 3 serrî mendo. Bi îşkenceyan dir rî bi rî mendo. Nika sirgunî Zîndanê Sîlîvrî kerdî. Ganî bêro zanayîş ke ma tena edalet wazenê."

	 

	'Ma do heta peynî kîşte tutanê xo de bê'

	 

	Lajê Muhsîne Ay 18 serrî yo tepişte yo, wina vat: "Ma seba 'Aştîye' ameyî Anqara. Lajê mi zîndanê Erdîrne de yo û 2 mengî yo seba teşhîsê "Emelbîyayîşê bi gonî' nêweşxane de yo. Seba rewşa lajê xo ma kewtî mîyanê tevgerî, dima ra berdî nêweşxane. Labelê dima ra bi nê halî berdî zîndan. Ma hemverê qorîcîtî vejîyayî û ma verê xo da Stenbol. Ma nêwaşt ke ma dişminîyê şarê xo bikerê. Ma wazenê tutê ma bi hizûr biciwîyê. Ewro seba ke ma aştî wazenê hêrişê ma kenê. La ganî bêro zanayîş ke heta peynî ma do pey tutanê xo bi û ma do têkoşînê xo dewam bikerê."

	 

	15 serreyî xo de 60 serrî ceza ci rê ameye dayîş 

	 

	Mustafa Acet 15 serrîya xo de ame tepiştiş, 60 serrî ceza ci rê ame dayîş û 11 serrî yo tepişte yo. Dadîya ci Nedîme Acet zî seba lajê xo Cizîrê Şirnexî ver bi Anqara ameye. Lajê Nedîme nika zîndanê  Bandirma de yo û nêeşkena şêro lajê xo bivîno. Bi 3 serrî yo lajê xo nêdîya. Ma waştiş kerd ke bîyarê cayêk nêzdî. Wa teda û tecrîdê hemverê tutanê ma peynî bikerê. wa peynîya nê zulmî bîyarê. Hêrişê tepişteyan kenê, tepişteyê nêweşna tedawî nêkenê. Ma Cizîr ra heta Anqara ameyî. Wa êdî no zilm peynî bibo. Wa şert û mercê tutanê ma bêro rastkerdiş. Ma tena edalet wazenê."