‘Hemverê zulmî bibê vengê tepişteyan’ 

2022-01-02 14:59:16


	 

	 

	AMED - Hemverê binpaykerdişê heqê tepişteyan şarê Amedî vengdayîşê hîsgêrî kerdî û vatî: "Hemverê kurdan zulmêk esto û bi taybetî zî zîndanan de no zulm kewto sewîyeya tewr cor. Ganî hemverê nê zulmî teber de têkoşînek bêro dayîş û lazim o ma bibê vengê tepişteyan." 

	 

	Tepişteyê nêweşî, pêwa nêweşîyê giran û raporan zî terkê mergî yenê kerdiş. Demê peyîn bi mehnayê cîya ne yenê dermankerdiş û ne zî yenê veradayîş. Keyeyê tepişteyan Wan û Amed de semedê rewşa tepişteyan dest bi çalakîya "Nobeta Edaletî" kerdî. Keyeyê tepişteyan vengdayîşê hîsgêrî rayaumumî rê kenê û wazenê ke ganî veng bidê waştişê tepişteyan. Şarê  Amedî zî serê rewşa zîndanan de qisey kerdî.

	 

	‘Bibê vengê tepişteyan’

	 

	Îrem Aras dîyar kerd ke kurdî semedê waştişê aştî yenê muhakamekerdiş û cezakerdiş û vat: “Semedê rewşa tepişteyan ma xeylêk xemgîn ê. Waştiş û têkoşînê ma tena semedê aştîyêk mende yo. La eke em hêz û têkoşînê xo bikerê yew û pîya vengêke xurt vejê do no zulm serê ma ra zî biqedîyo. Ganî xêrcê merdimê tepişteyan bi taybet cinî û ciwanî zî bibê vengê tepişteyan. Eke kurdî destê yewbînan bigîrê û vera nê zulmî xoverdayîşêk bi hêz nîşan bidê do dişmin tu wext sernêkewo.”

	 

	‘Hukmêk xoser nîyo’

	 

	Kiymet Iliman zî wina qal kerf: "Tecrîd û zulmê serê tepişteyan şermezar kenê û ganî tepişteyê nêweşî bêrê dermankerdiş. Tepişteyê mi çin ê la pêro tepişteyî sey tutê min ê. Ez rewşa tepişteyan ra xeylêk endîşeyîn a.  Lazim o ke heme kesî seba rewşa tepişteyan vengê xo berz bikerê. Her tim zulm kerdê û nika zî sewîyeya zulmî pîl kerdî. Coka ganî hemverê nê zulm û zordarî serewedarişêk pîl bibo. Edalet û huqûqê Tirkîya şaş o û hukmêk xoser çin o. Erdogan zulm serê kurdan de keno." 

	 

	‘Hemverê zulmî xoverdayîş…’

	 

	Tewr peyîn Şemsîhan Aslan qisey kerd û vat: "Verê ra heta nika zulm û zordarîyê hemverê kurdan kêm nêbîyo. Hemverê nê zulm û zordarî zî têkoşîn û xoverdayîş her tim bi para kurdan. Semedê bindestî xeylêk rayîr û metodî yenê xebitnayîş. Nînan ra yew zî  tecrîd o. Rewşa zîndanan ma qebûl nêkenê. Selahîyetdarî bixo zî rewşa înan ma başêr zano la kerr û lal o. Rewşa tepişteyê nêweşan verê çiman de yo û xora raporan de zî yeno eşkerakerdiş, labelê rapor goreyê berjewendî yeno amadekerdiş. Ma nêwazenê êdî zîndanan ra cenaze vejîyê. Na dewlete dir merdimayî û wîjdan lazim o. Merdimê tepişteyan zerrîveşayeyê û seba rewşa tepişteyanê xo perîşan ê.”