Fehîme Poyraz: Eke şar wurzo serê lingan do edalet bi ca bêro  

2022-01-01 13:46:56


	 

	ÎZMÎR - Dadîya Denîz Poyraz, Fehîme Poyraz bale ant serê paştdayîş û wayîrvejîyayîşê dewaya Denîze û vat, ganî no paştdayîş roniştişê bînan de zî dewam bikero. Fehîme wina vat: “Huqûq û heq bi şarî qedêno. Eke no şar wurzo serê lingan do edaleto pîl bi ca bêro."

	 

	17ê hezîrane de hemverê bînaya Partîya Demokratîke ya Şaran (HDP) Îzmîrî gumanbar Onur Gencer hêriş kerdibi û Denîz Poyraz qetil kerdibi. Yewin roniştişê dewaya ke kiştoxî ci ra ameyî muhakemekerdiş 6in Dadgeha Cezaya Giran ya Bayrakli de ame vînayîş. Dadîya Denîze, Fehîme Poyraz ke tewrê roniştişî bî, çîyê vernîya roniştişê ameyî ciwîyayîş ajansê ma rê qal kerd.

	 

	Fehîme dîyar kerd ke vernîya  roniştişî bi seyan kesî verê edlîye de kom bîyê û pê kêfweş bîyê, “O wext mi waşt ke ez hîn çîyan vajê la mi nêeşka vajî. Eleqeyê cinîyan, baro û parlamenteran xeylêk weş bi."

	 

	'Gumanbarî bê kelepçe ardî' 

	 

	Fehîme dîyar kerd ke kiştox Onur Gencer mabêne leşkeran de bê kelepçe ardê û lajê min Suleyman Poyraz yê tepişteyî bi kelepçe ardî û wina vat: "Kiştox ewnîya ma ra û huya. Leşkeran ê pawitî. La destê lajê mi bi kelepçe bî. Kiştox bi rehetî ame salone. Avûkatan vat, ‘yê kiştoxî akerdebî, yê bîn zî abikerê.' Dima ra kelepçeyê ey zî vetî."

	 

	'Yê ke kiştoxî pawenê estê' 

	 

	Fehîme wina vat: "Kiştox hêzê xo cor ra gêno. Paşta ey xurt a, eke wina nêbîne, do nêeşkayîne biameyîne. Do nêhuyayîne. Kam vera mi bibayîne nêeşkayîne biameyîne. Kam vera mi bîne ey kuyayîne. La ez dayîk a. Yê ke ê pawenê estê. Wina nêbîne do destê ey kelepçekerdebîne.”

	 

	'Senîn hende rehet niştî ro'

	 

	Fehîme dewam de wina vat: “Gelo qet nêame verê çimanê ey. Gelo wijdanî ey çinbi? Senîn hende rehet nişt ro? Ê hêz kamî ra girewt. Werrekna qisey bikerdêne. Serekê dadgehe zî bêveng bi çîyêk nêkerd. Parlamenteran reaksîyon ramojnayî, ‘tîya cayê huqûq û heqî yo.’ La serekê dadgehe zaf rehet bi.”

	 

	'Ez edalet şarî rê verdena'

	 

	Fehîme seba dewamkerdişê paştdayîş û paştdayîşê dewaya Denîze veng da û vat: “Huqûq û heq verê şarî de qedêno. Şar her tim wayîrê merdimê xo vejîyê. Eke şar  wurzê serê lingan do edeletê pîlî bi ca bêrê."