Şîlane: Ma xebate serê girîngîyê ziwanî de semedê komelî kerd 

2021-12-20 14:50:39


	 

	 

	Sema Çaglak

	 

	AMED - MED-DERî emsar zî bi proje û kampanyayê tewir bi tewir xebatê xo yê derheqê ziwan de dewam kerd. Hemsereka MED-DERî Şîlan Elmaskan, vat: “Emsar înan xebatê xo serê girîngîyê xebitnayîşê ziwanî de komel de kerdê û bi giranî girîngî dayê musnayîşê ziwanê dayîke."

	 

	Komeleya Cigêrayîşê Ziwan û Kulturê Mezopotamyayî (MED DER) serra 2017 de bi amancê perwerde û averşîyayîşê ziwanê kurdkî de Amed de ame awankerdiş. Komela serê ziwanê kurdkî de xebatanê xo kena. Bi lehçeyê kurdkî; kurmancî û kirmançkî komele perwerde dana. Komela emsar zî bi projeyên tewir bi tewir xebatê xo kerdî. Bi taybetî emsar xebate serê girîngîyê ziwanî de ame kerdiş û semedo ke hişmendiyê ziwanî mîyanê komelî de vila bibo tewr zêde xebitya. Derheqê xebatê MED-DERî yê emsarî de Hemsereka MED-DERî  Şîlan elmaskan ajansê ma rê qisey kerd.

	 

	'Tewir bi tewir babetan de xebatan kerdî'

	 

	Şîlane destpêkê qiseykerdişê xo de vat, serra 2015ine de sazgehê kurdkî hetê dewlete ra ameyî padayîş û wina dewam kerd: "Dimayê 2015 de hetê girîngîyê ziwan û musnayîşê ziwanî de vengîyêk virazya. Coka ma zî taybetî têkîliyê ziwan û komel, têkiliyê ziwan û sazgehan, têkiliyê ziwan û polîtîkayê dewlete û têkîliyê ziwan û sîyasetî de vindertî. Sewbîna ma kampanyayê semedê ziwanê kurdkî bibo ziwanê fermî û perwerdehî, ma wareyê musnayîşê ziwan ê tutan bi cinîyan dir xebate kerd. Ma emsar sey komele bi nê babetan dir kar û xebat da vernîya xo."

	 

	'Perwerdeyê onlîne û rî bi rî pîya ame kerdiş' 

	 

	Şîlane dewam de wina vat: “Ma pandemî de xebatê xo serê online dabî destpêkerdiş. Dima ra ma dersê rî bi rî dayî destpêkerdiş û her di tewir perwerde pîya kerd. Heme xebatî bi onlîne ameyîne kerdiş û no dezavantaj bi. Labelê semedê kesê ke îmkanê înan ê semedê ameyîşê komeleyî çin bi, no zî îmkanêk baş bi. Bi no hawa ma xo tewr zêde resna kesan û perwer de da. La bêguman perwerdeyo rî bi rî tewr baş o û manewîyatê ci zêde bi."

	 

	'Kampanya bale komelî ant serê ziwanî'

	 

	Şîlane dîyar kerd ke ganî neteweyê xo û ziwanê xo serê kaxidan de nêsencê û wina vat: "Ma 2 hezar îmza arêdê yan zî kêm arêdê no nîno manaya înkarkerdişê kurdan. Bîyayîşê kurdan xo ra nê ispat keno. Verê zî bi milyonan îmza ameyî arêdayîşî la nê îmzayî nêresayî amancê xo. Semedo ke nêhesibnayîşêk werte de yo. Semedê nê arêdayîşê îmza senc nîyo. Xora bi mîlyonan kurdî estê û bi ziwanê xo qisey kenê. Ganî no bêro vînayîş û wina nêzdî bibê. Îmza zî semedê hende hêriş û qedexeyan nêresa amancê xo. La no reyke bîn zî bala komelî ant serê  ziwanê kurdkî û perwerdeyê bi ziwanê kurdkî.”

	 

	'Ganî ma keyeyanê xo bikerê wendegeh'

	 

	Şîlane tewr peyîn wina vat: "Ma do reyna xebatanê xo bikerê û têkilîyê cinî û ziwanê do bidê vernîya xo. Neteweyê ke semedê ziwanê xo têkoşîn nêkero; wareyê kultur û ziwan de tim kêm maneno. Ganî no wareyî de zî cinî têkoşîn bikerê. Ganî ma rol û mîsyonê netewbîyayîşê xo bi ca bîyarê û ziwanê xo bipawê. Ganî ma heme wareyê xo bikerê wendegeh. Bi nê şiklî kultur û ziwanê xo bipawê. Ma pabeyê îmkananê dewlete nêmanê, çike eke her keyeyêk bibo wendegeh ma do biresê amancê xo. Ganî semedê ziwanê kurdkî, kurdî bêrê têhet û pawitişê bîyayîşê xo bikerê."