Nuray Ozdogan: Tecrîdê serê Îmraliyî heme zîndanan de vila bîyo 

2021-12-19 13:06:55


	 

	 

	Oznur Deger

	 

	ENQERE - Avûkate Nuray Ozdogan dîyar kerd ke dewlet û hukmat tepişteyê polîtîk sey rehîne vînenê û wina vat: "Sey dewamîyê huqûqê cezaya dişminî, huqûqê înfazî yê dişminî bi hawayê xo yê tewr giran yeno caardiş. Tecrîdê giran û nêhuqûqî yê Îmraliyî bi serran o bi ca yeno heme zîndanan de vila bîyo."

	 

	Bi şerdê tecrîdê israr dewam keno de zîndanê Vakur û Tirkîya her roje binpaykerdişê heqê neweyî yê dewam  kenê zêde benê. Tedbîrê ke zîndanan de nînê girewtiş,tepişteyê ke nînê tedawîkerdiş û tepişteyê ke pêwa raporê Sazgehê Tipê Edlî (ATK) zîndanan ra yenê girewtiş, nîşaneyê tecrîdê giran ê zîndanê Asayîşê Berzî yê Îmraliyî yo. Garîbe Gezer ke hetê gardiyanan ra ameye tecawuzkerdiş, 9ê Kanûne de Zîndanê Hûmara Yewin ê Kandirayî de bi guman dinyaya xo bedilna, caardişê serê cinîyan fîneno verê çiman. Tepişteyo nêweş Halil Guneş û Abdurrezak Şuyur yê ke bi raporê ATKyî zîndanan de ameyî verdayîş û dinyaya xo bedilnayî nimuneyê îşkence zîndanan de yeno kerdiş o. 

	 

	Avûkate Nuray Ozdogan derheqê binpaykerdişê heqê zîndanan de zêde benê û rewşa tepişteyê nêweşan ercna.

	 

	'Tecrîd heme zîndanan de vila bîyo' 

	 

	Nuraye dîyar kerd ke zîndanê Tirkîya vurnayê cayê mergî û wina vat: "Her demî de zîndanî bîyê problemê pîl. Tecrîdê bi awankerdişê zîndanê Tîpê Fyî dest pêkerd heme zîndanê tepişteyê sîyasî ci de yê, ame destpêkerdiş. Bi pandemîyî dir rewşe hîna vurya.  Mehkûmê edlî binê nameyê qanûnê  înfazî de ameyî efûkerdiş û ameyî veradayîş. Labelê tecrîdê serê tepişteyê polîtîk her ke şi tewr zêde bi. Sey dewamîyê huqûqê cezaya dişminî, huqûqê înfazî yê dişminî bi hawayê xo yê tewr giran yeno caardiş. Tecrîdo giran û nêhuqûqî yê Îmraliyî bi serran o bi ca yeno heme zîndanan rê vila bîyo."

	 

	'Merdişê bi ca ameyî cînayet ê û versucê înan zî îdareyê zîndanî yo' 

	 

	Nuraye dewam de wina vat: "Tabloyêke binpaykerdişê heqan esto. Helwestê dewlete û îqtidaro ke fikiryeno heqê cuye ya muxalîfan çin o, bingehê caardişê îdareyê zîndanan awan keno. Wa kes îddia nêkero ke nê merdişî, merdişê xozayî yê. Kesê nêweşî mîyanê şerdê kesê saxî de zî nêeşkenê bimanê, yenê verdayîş. Coka nê merdişî cînayet ê. Versûcê cînayetan zî îdareyê zîndanan o. Sewbîna hekîmê ke vanê 'eşkeno/a zîndan de bimano' zî versûc ê."

	 

	'Garîbe cinîyêka têkoşer bî û ameye qetilkerdiş'

	 

	Nuraye bale ant serê merdişê bi guman ê Garîbe Gezer û wina vat: "Garîbe cinîyêka têkoşer bî û ameye qetilkerdiş. Problemê aye yê weşî ameyîne zanayîş û hucreyê yewkesî de ameye verdayîş. Hêrişê cinsî yê giran ci rê ame kerdiş. Coka ma nêeşkenê mergê Garibe ra vajê întihar o, aye nêmerda ameya kiştiş. Ma çîyêk nê sîstemê hukmî ra musayî. Demo ke selahîyetdarê dewlete û meqamê îstîmlakî biwazê çîyêk binimnê derheqê dosya de qerarê nimite danê."

	 

	'Serebûtê munferît nîyê'

	 

	Nuraye veng da rayaumumî û wina vat: "Ganî êdî zîndanê ke açaryayê cayê mergî bêrê vînayîş. Semedê kesê ke şer de zî rehîn yenê girewtiş, ganî huqûqê merdiman bi ca bêro labelê caardişê serê tepişteyê sîyasî bîyê sîstematîk. Nê serebûtê munferît nîyê. Oyo ke yeno tercîhkerdiş caardişê sîstemê înfazî yê ceza yo."