Tepişteyo nêweş Halîl Guneş dinyaya xo bedilna 

2021-12-15 15:19:11


	 

	AMED - Tepişteyo nêweş Halîl Guneş ke semedê ci xeylêk rey muracat ame kerdiş, dinyaya xo bedilna.

	 

	Tepişteyo nêweş Halîl Guneş ke Zîndanê Amedî yê Asayîşê Berzî de tepişte bi, dinyaya xo bedilna. Halîl lîsteyê tepişteyê nêweşan ê Komeleya Heqê Merdiman (ÎHD) de ca girewtêne. Pêwa heme vengdayîş û muracatê veradayîşî zî Halîl nêame veradayîş û no serê sibayî de koçê peynî kerd.

	 

	Halîl 2yê çeleyê 1993 de hema 23 serreyê xo de yeno tepiştiş û cezaya muebetê girankerde yanî heta hetayî ameye dayîş. Nêzdîyê 29 serrî bi ke tepişte bi. Demêk derg bi ke Halîl bi nêweşîyê sey qanserê kezebe û esteyî dir têkoşîn kerdêne. Roja ke ameyo tepiştiş heta nika 15 zîndanan de ameyo gêrnayîş. Dimayê ke Halîl demê destbendkerdişî de îşkenceyo giran ci rê amebi kerdiş, nêweşî ci de peyda bî. Nê nêweşî serrê peyînan ê zîndanî de ci giran bî.

	 

	Avûkatan semedê veradayîşê Halîlî muracatê dozgerî kerdibî. Netîceyê muracatî de Nêweşxaneyê Perwerdeyî û Cigêrayîşî yê Gazî Yaşargîl ê Amedî de raporê “nêeşkeno zîndan de bimano" zî dabî, labelê Sazgehê Tibê Edlî (ATK) 29ê çeleyê 2014 de raporêk newe amade kerd û qerar dabi ke Halîl eşkeno heps de bimano. Nê ser de avûkatan muracatê Dadgeha Qanûnê Bingehîn (AYM) kerdibî la cewabêko pozîtîf nêamebi dayîş. 

	 

	Waya Halîlî çalakîya “Roniştişê F” yê ke Şubeyê ÎHDyê Stenbolî organîze keno, hewteyê 445ine  roja 3ê teşrîna verêne 2020ine de wina vatibi: Demo ke sewqê Zîndanê Tîpê Fyê Amedî kerdê, wazenê ke birayê mi mîyanê şertê xirab de cuya xo dewam bikero. Bi bahaneyê pandemî dir 6 mengî yo birayê mi nêbenê tedawî. Merg birayê mi rê ferz kenê. Mimkin nîyo birayê mi nê bêrûmetî qebul bikero. Ma wazenê demêk nêzdî de şertê ci bêrê başkerdiş û birayê mi serbest bêro veradayîş