Tepişteyê nêweşê giranî Abdulrezzak Şuyur dinyaya xo bedilnaye 

2021-12-15 14:46:23


	 

	MERKEZÊ XEBERAN - Tepişteyê nêweşê giranî Abdulrezzak Şuyurî Zîndanê Şakranî de seba ke nêame tedawîkerdene dinyaya xo bedilnaye.

	 

	Tepişteyê nêweşê giranî Abdulrezzak Şuyuro 56 serrî Zîndanê Şakranî yê Îzmîrî de dinyaya xo bedilnaye.

	 

	Abdulrezzak 1993 de Mugla de bi îdîaya ''endamîya rêxistine'' amebi tepiştene û cezaya muebede dîyabî ci. Abdulrezzak Sêrt û Dîlokî ra dima Zîndanê Şakranî rê amebi surgunkerdene û tede kanserê cigêrî estbi.  Abdulrezzakî tewr peyên 2 hewteyî verî lajê xo reyde pêvînayîş kerdbi, a roje ra nata tira xebere nêamebî girewtene.

	 

	Birayê ci Muhsîn Şuyur vizêr seba pêvînayîşî şi zîndan. Îdareyê zîndanî verî ke sebebêk vajo nêverda ê pêvînayîşî bikerê. Saetêke dima ke Muhsîn Şuyur zîndanî ra vejîya îdareyî keyeyê Şuyurî rê telefon kerd û vat ke Abdulrezzakî dinyaya xo bedilnaya. Abdulrezzakî serrêke verî waştbi ke vera bidîyo la waştişê ci amebi redkerdene. 14 mengî mendbî ke Abdulrezzak zîndanî ra vejîyo.

	 

	Birayê ey Yunus Şuyurî da zanayene ke mengêke verî înan yewbînî dîbî û vat: ''Ma persenê: mîyanê mengêke de o senî kewto nê halî? Ma nêzanenê amelîyat bîyo yan nê. 2 hewteyî bi ma tira xebere nêgirewtêne. O nêame pêvînayîşê telefonî zî. Gelo ey xo kişto? Çira merdo?  Mergê ey ser o nakokîye esta.''

	 

	Merdimanê Abdulrezzakî semedê girewtişê cenaza Stenbol û Sêrtî ra verê xo da Îzmîrî. Cenaza do Sêrt de bêro definkerdene.