'Tu kes nêeşkeno êzîdîyan çin bikero' 

2021-12-11 13:12:27


	 

	Sîdra Mamo

	 

	ŞEHBA - Koordînasyonê Yewîya Cinîyê Êzidî yê Rojawanê Kurdistanî Suad Hiso derheqê hêrişê dewleta tirkî yê serê Şengalî de wina vat: "Bi serran o hemverê êzidîyan qirkerdiş yeno kerdiş. Nika zî dewleta tirkî ya faşîst her roje rayberanê ma hedef gêna û wazena ma bitersnê. La wa bizanê komelê êzidî rawuşto serê lingan û ma tu wext rayîr nêdanê dagirkeran ke êzîdîyan çin bikerê."

	 

	Tarîx de her tim qirkerdişî hemverê komelê êzidî kenê. Dewleta tirkî reyna hewil danê ke êzîdîyan çin bikerê. Semedê nê reyna 7ê Kanûne de hêrişê Şengalî kerd. Wesayîtê Hemserekê Heyetê Îdarekarê Şengalî Merwan Bedel Xwedêda hedef girewt û Merwanî dinyaya xo bedilnaye. Derheqê babete de Koordînasyonê Yewîya Cinîyê Êzidî yê Rojawanê Kurdistanî Suad Hiso qisey kerd.

	 

	'Tu kes nêeşkeno êzîdîyan çin bikero' 

	 

	Suade destpêk de wina vat: "Ma hêrişê deweta tirkî yê dagirkerî serê Şengalî de ke bî sebeb Merwan Bedel şehîd bikewo, şermezar kenê. No reya yewin nîyo ke dewleta faşîst rayberê ma hedef gêna. Semedo ke serra 2014 de roja fermanî ra heta nika her tim wazenê êzîdîyan çin bikerê. La êzidiyan û bi taybetî cinîyê êzidî dimayê fermanî xo bi rêxistin kerdî. Êzîdîyan newe ra hêzê xo awan kerdî. No nêame hesabê dişminî coka zî hêrişê Şengalî kenê. Dewleta faşîste ya tirkî her tim planê xo hemverê êzidiyan kena. Sey pêkerdişê 9ê teşrîna verêne de. O wext waştêne îradeyê êzidîyan bişkinê. Senîn ke dagirkeran vernîya nê rayberê ma Saîd Hesen, Zerdeşt Şengalî û Mam Zekî bi planê xo yê lêşîn şehîd kerdî, nika zî wazenê dewamê nê bîyarê. Nê planî serê Merwan Bedelî de zî kerdî. Labelê komelê êzidî wuşto serê lingan û ma tu wext rayîr nêdanê dagirkeran ke êzîdiyan çin bikerê."

	 

	'Dewleta trikî ya dagirkere hêzê êzidîyan ra tersena' 

	 

	Suade wina vat: "Ma sey cinîyê êzidî serê rêça şehîdê xo de şinê. Ewro bi hedefgirewtişê rayberê ma, ma talan nêbênê. Labelê eksê ci tolê ma tewr pîl beno. Ma do rojane wareyan de bê û xebate bikerê. Bi fikr û felsefeyê Rayber Apo komelê êzidî resa na sewîyeya serkewtişî. Ma sey cinîyê êzidî bi her hawayî xo perwerde kenê û bi rêxistin kenê. Ma tu wext rayîr nêdanê dagirkeran ke êzidîyan çin bikerê. Tarîxê ma heme ferman o, la nika êzidî sey verê nîyê. Her kesêk wazeno ma çin bikero la ma do hemverê nînan bibê cewab. Ma do xo ver bidê û xo biresnê her cinîyêke êzidî ya bindeste. Dewleta tirkî ya dagirkere hêzê ma ra tersena, hêrişê ma kena. Hêzê ma tu wext nîno şikinayîş.