Çalakîya 'Nobeta Edaletî' ya Keyeyê Şenyaşarî 277 rojî yo dewam kena 

2021-12-10 14:46:29


	 

	RIHA - Keyeyê Şenyaşarî verê Edlîyeyê Rihayî de roja 277ine de têkoşînê xo yê edaletî dewam keno.

	 

	Emîne Şenyaşar û lajê xo Ferît Şenyaşar yê ke hîrê merdimê keyeyê înan hêrişê AKPyijan de 14ê hezîrana 2018ine de ameyî kiştiş, Nobeta Edaletî gênê, roja 277ine de çalakîya xo dewam kerdî. Keyeyê Şenyaşarî nê serê sibayî zî qezaya  Pirsûsî ra ameyî verê Edlîyeyê Rihayî û cayê çalakî de nobeta xo dewam kerdî.

	 

	Keyeyî welatij û avûkatê ke şîne edlîye qalê nêheqîyê ke înan yenê kerdiş kerdî. Keyeyî serê hesabê xo yê medya dîjîtalî de zî nê mesajî pare kerd: "Ewro îne yo. Îmamê girêdayê Serekkomarî do nimajê xutbe bikerê. Do Sûreya Nahl de ke ‘Homa edalet ferman keno’ derbaz beno, biwanê. Do verê berê edlîyeyan zî huqûqî serwerî bêro  sepênayîş.”