Welatijê Setkarî reaksîyon vera nêviraştişê rayîrî dayî 

2021-12-10 13:11:55


	 

	 

	Rojda Aydin

	 

	ŞIRNEX - Welatijê dewa Setkarî ya Elkê semedê nêviraştişê rayîrê dewe gerreyox ê û vatî: "Semedê nêviraştişê rayîrê dewe ma zimistanî bi problemê xidar dir rî bi rî manenê.  Ma nêeşkenê tutanê xo bişawê  wendegeh, ma nêeşkenê şêrê qeza û dayîşûgirewtiş bikerê. Rayîrê dewe yê qorîcîyan yeno viraştiş, la yê ke mendê yenê peygoşkerdiş."

	 

	Dewa Setkarî ya qezaya Elkê ya Şirnexî serrê 90î de bi desan rey bi teda û zordarîyê dewlete dir rî bi rî mende û tewr peyîn zî ameye veşnayîş. Welatijê dewe mecbûr dewe xo terk kerdî. Çend keyeyî binê dewe de reyke bîn keyeyê xo awan kerdî. Nika dewe de 15 keyeyî estê û nêzdîyê 60 kesî dewe de ciwîyenê. Semedê welatijê dewe nika problemo sereyîn nêviraştişê rayîrê dewe yo. Waştişê roniştoxê dewe viraştişê rayîran o û la hetê Şaredariya Elkê û Qeymeqemtiyê Elkê ra yenê peygoşkerdene. Welatijê dewe bale antî serê rewşa ke ciwîyenê. 

	 

	'Ma dewe ra vetî'

	 

	Zeynep Temel (50), destpêkê qiseykerdişê xo de bale ant serê weşikîya dewe û vat: "Dewa ma xeylêk weş a. Cuya ma ya dewe çend weş bo zî zehmetîyê ci estê. Vernîya na dewe, ma dewa corî ya Setkarî de bî. Serrê 90î de dewa ma ameye veşnayîş û ma dewe ra vetî. Ma zî xo rê dewêke bîn awan kerd. Ma hamnanî karê bax û baxçeyan dir eleqedar benê û şinê zozanan heywananê xo wey kenê. Zimistanî zî ma heywananê xo zere de wey kenê. Ma debara xo bi nê rengî kenê."

	 

	'Semedê varayîşê vewre rayîrê dewa ma yeno padayîş'

	 

	Zeynepe tewr peyîn wina vat: "Tîya zimistan xidar derbaz beno. Vewre zêde varena û rayîrê dewe semedê vewrî yeno padayîş. Tutî bi zehmetî şinê wendegeh û şîyayîşê qeza zehmet o. Semedê viraştişê rayîran ma xeylêk rey muracatê Şaredarîya Elkê û qeymeqemtiyê qeza kerd. Rayîrê dewa qorîcîyan viraznenê, la ê ma qet goş nêdanê. Ma dewijî bi îmkananê xo rayîr viraznenê la qîm nêkeno."

	 

	'Ma xo rê dewêke bîn awan kerd'

	 

	Soylemez Temel (40) zî wina vat: "Verê ma dewa Setkarî de bî. La dewe ma ameye veşnayîş û qorîcîtî ma rê ameye ferzkerdiş. Ma zî fek dewa xo ra vera da û ma xo rê dewêke bîn awan kerd. Ma dewe de debara xo bi weykerdişê heywanan kenê. Sewbîna wisar û hamnanî zî bi ramitişî dir eleqedar benê."

	 

	'Wa rayîrê dewa ma viraznê' 

	 

	Soylemeze vatişê xo wina qedêna: "Rayîrê dewa ma semedo ke nîno viraştişî, bi taybetî ma zimistanî bi probleman dir rî bi rî manenê. Ma xeylêk muracat kerd, la cewab nêdayî ma. Sebeb zî vanê, 'Semedo ke hûmara roniştoxê dewe tay a, ma nêviraznenê." Zimistanê wesayîtî nînê dewe. Semedê nê ma heta serê cadeyî rayîra şinê. Bi taybetî semedê tutanê ma zaf zehmet o. Tutê ma her roje heta serê rayîrî şinê.  Bi zanebîyayîş rayîrê dewa ma nînê viraştiş. Rayîrê dewê bînan ameyî viraşti, semedo ke qorîcî yê. Ma wazenê ke rayîrê dewa ma bêrê viraştiş."