'Vîrus nêqedîyayo, tedbîrî qels ê, aşîkerdiş qels o' 

2021-12-05 15:57:13


	 

	 

	ANQARA - Doç Dr. Denîz Erdogdu, dîyar kerd ke hawayêke sey vîrus qedîyayo yeno awankerdiş û vat, tedbîrî qels ê û hûmara aşîbîyayîş zî qels menda.

	 

	Tirkîya de serê tespîtkerdişê vîrusê korona (COVÎT -19) dir 20 mengî derbaz bi. Nê prosesî de bi hezaran kesî dinyaya xo bedilnayî û roje de nêzdîyê 200 kesî dinyaya xo bedilnenê. Polîtîkayê Tirkîya yê vîrusî yenê munaqeşekerdiş û dimayê varyantê Delta dima, varyanta Omîcron zî vejîya werte û  rîskê cidî hewêneno. Omicron ewil Başurê Afrîka de vejîya. Dima ra Avustralya, Belçîka, Botsvana, Îngîlîstan, Danîmarka, Fransa, Almanya, Hong Kong, Israîl, Îtalya û Holanda de ame vînayîş. Goreyê eşkerayîya wezaretê weşîye hema  Tirkîya de Omîcron nêameyo vînayîş la xeylêk welatan rê sînorkerdişê gerî ard.

	 

	Endama Konseyê Merkezê Yewîya Tabîbê Tirkî (TTB) Doç Dr. Denîz Erdogdu derheqê varyantê newe û polîtîkayê vîrusî de qisey kerd.

	 

	'Varyanto newe tewr bi tehluke yo' 

	 

	Denîze dîyar kerd ke xeylêk tewirê varyantê kovîdî estê û demî dir vîrus xo vurneno û çiqas derbasê merdiman bibo hende tewirê varyantî vejênê werte. Denîze vat: “Îngîlîstan de Aflfa, Başurê Afrîka de Beta, Brezîlya de Gamma, Hîndîstan de Delta ame tespîtkerdiş. Yê peyîn zî Omîcron Afrîka de vejîya. WHO semedê tesîrê varyantê Omîcron rewşe ra bi endîşe vîneno û seranserê dinya rîskê Omîcron vejêno berz o. Nika dinya de hezar kes pê kewto. No zî ma keno endîşe. O baş oyo ke bi testê PCR no bêro testkerdiş. Rewşe goreyê mi cidî ya. La Tirkîya cidî nêgîna. Eşkerayîya ke wezaretê weşîye dayo kêm o. Semedê nê varyantî nêgêreno do nêro vînayîş. Çi heyf Tirkîya na rewşe cidî nêgîna.”

	 

	‘Dayeyê wezaretî rastîyan nêmojnenê’ 

	 

	Denîze vat, se ra 10ê nifusê Tirkîya korona derbaz kerdo 8 hezarî zêdeyêr nê vîrusî kewtê û eşkerayî rast nîyê û wina vat: “Tabloyê têkoşînê hemverê vîrusî baş nîyo. Kedkarê weşîye nê prosesî de xeylêk xesar dîyî. Ma 24 saetê peyîn de 6 xebatkarê weşîye vînî kerdî. Vînîbîyayîşê xebatkarê weşîye vejîya 500î. Nêzdîyê 165-170 doktorî dinyaya xo bedilna. No zî  cidiyet zaf baş vejeno werte. Aşîkerdiş zaf qels bîyo. Rojêke de eşkeno milyonêk û nîm aşî bêro kerdiş. Sewbîna tedbîrî xeylêk qels ê. Ganî seçedê her kesî maskeyê bi kalîte û bêpere bêrê dayîş. Fabrîka, kargerî û wesayîtan de ganî tedbîrê hewa bêrê girewtiş. Semedo ke tedbîrî xeylêk qels ê. Ganî tedbîrî bi rêk û pêk bêrê kontrolkerdiş. Ganî fabrîkayan de derbazê sîstemê bi vardiya bibê.”