'Waştişê keyeyê tepişteyan waştişê ma yê' 

2021-12-02 09:29:04


	 

	 

	 

	Sema Çaglak

	 

	AMED - Paştdayîşê Nobeta Edaletî ya merdimê tepişteyan ke Baroyê Amedî de dabî destpêkerdiş, dewam keno. Cinîyan dîyar kerd ke ganî tena merdimê tepişteyan ney, her kes wayîrê nobete vejîyo.

	 

	Merdimê tepişteyan bi amancê bale bi ancê serê rewşa tepişteyê nêweşan û veşnayîşê înfazan û nêtehlîyekerdişê tepişteyan, 16ê teşrîna peyêne de awanîya Baroya Amedî de çalakîya "Nobeta Edeletî" dayî destpêkerdiş. Çalakîya tepişteyan roja 17ine de dewam kena. Roj bi roje paştdayîşê keyeyê tepişteyan û rayaumumî zêde  beno. Hemsereka Komeleya 78ine Halîse Batgî, Asîye Şîmşek û Emîne Işik ke di lajê ci tepişteyê ajansê ma rê qisey kerdî û bale antî serê girîngîyê "Nobeta Edaletî".

	 

	'Ganî bi hîsgêrî nêzdîyê rewşa tepişteyan bibê'

	 

	Halîse Batgî, dîyar kerd ke rewşa tepişteyan verê çiman de yo û ganî tepişteyê nêweşî bêrê veradayîş û vat: "Nobeta merdimê tepişteyan xeylêk bi mana û girîng o. Tepişteyê rewşêke xirab de yê û heqê înan yeno binpaykerdiş. Tena merdimê tepişteyan ney, ganî merdimê tepişteyan her kes bi hîsgêr nêzdîyê rewşa tepişteyan bibo. Hîn tepişteyî estê ke nêeşkenê lazimîyê xo yê bingehîn bi ca bîyarê. Sewbîna nînê dermankerdiş zî. Cayê ê nêweşan zîndan nîyo û ganî bêrê tehlîyekerdiş. Sewbîna êdî bes o wa  kezeba dayîkan nêveşo."

	 

	'Ganî heq, huqûq û edalet bi ca bêro'

	 

	Asîye Şîmşek zî destpêkê qiseykerdişê xo de nobeta merdimê tepişteyan silam kerd û vat: "Tu çîyêk bi zulm û zordestî nêbeno. Ganî heq û huqûq û edalet bi ca bêro. Bi seyan tepişteyî zindanan de binê şert û mercê xirab de yê. No zulm do heta key dewam bikero. Dayîkê ke nobete gênê ez silamanê xo înan rê şawena. Zerrîya mi înan dir a. Nobeta înan çîyêk qij nîya, hende dayîkî pêwa emr û nêweşîyê xo her roje şinê semedê tutanê xo nobete gênê."

	 

	'Tepişteyî binê îşkence de yê'

	 

	Emîne Işik zî wina vat: "Lajê mi zîndanê  Gîresûn de tepişte yo. Semedo ke ma ra zaf dûrî yo, îmkanê ma nêbenê ke ma ey zêde bivînê. La qasê ke bi rayîrê telefonî ma ra vano, rewşa înan zaf xirab a. Lajê mi zî surgunê zîndanê Amedî Tîpê Fyî ame kerdiş. Gama ke surgun kerdî, nêverdayî tu eşya û cilanê xo bero. Zulm û îşkeceyêk pîl înan rê ame kerdiş.  Lajê mi nika hucreyê yew kesî de yeno tepiştiş. Tehda bi înan kenê û binê îşkenceyî de yê. Rastê cigêrayîşê zitî yenê."

	 

	'Waştişê keyeyan waştişê ma yê'

	 

	Emîne tewr peyîn wina vat: "Tecrîdê tepişteyan her ke şino xo tewr kur keno. Xeylêk tepişteyê nêweşî ke rewşa înan weşîye tehluke de ya. Tepişteyê ke gerek biameyîne tehlîyekerdiş estê. Ma nê zulmî û bêhuqûqî qebûl nêkenê. Waştişê keyeyê ke nobete de yê, waştişê ma yê. Wa semedê tepişteyan edalet bi ca bêro û wa êdî zerrîya ma nêveşîyo."