Cinîyê Amedî: Semedo ke rûn keye de çin o ma nêeşkenê werd viraznê 

2021-11-26 13:02:39


	 

	 

	 

	Derya Ren

	 

	AMED - Hukmato ke feqîrîyê şarî nêvîneno, hemverê vengdayîşê ‘îstîfayî’ zî bêveng maneno. Cinîyê  Amedî derheqê krîzê ekonomî de qisey kerd û dîyar kerdî ke ê nêeşkenê debara xo bikerê û wina vat: "Ma gelo hukmat esto ke îstîfa bikero. Welat nîno îdarekerdiş."

	 

	Dovîz her ke şino diçe vay beno û Banka Merkezî (TCMB) menga êlule, teşrîna verêne û teşrîna peyêne de bi proyî 400 puan faîz vist û nê zî bi lez erjna TL zî her ke şino hemverê dowîzî de erjan beno û bi hezaran kesî hemverê nê vengdayîşê îstîfayî hukmatî kerd. Şarê ke keweno kuçeyan û vanê ma debara xo nêeşkenê bikerê, esnaf zî bi eşkerayîyê, ‘ma dikanan padanê' diyar kenê ke nêeşkenê debara xo bikerê. Sewbîna selahîyetdarê hukmatê kesê ke vengdayîşê îstîfa kenê zî sey terorîst bi name kenê û krîzê ekonomî nêvînenê.

	 

	Ma krîzê ke  yeno ciwîyayîş û vengdayîşê 'îstîfayî' cinîyê Amedî rê pers kerd.

	 

	Wendekara unîversîte Seher Yilmaz: Ez vengdayîşê şarî yê îstîfayî rast vînena. Şar ameyo nuqteyê ke nêeşkeno nan bigîro. Ez wendekara unîversîte ya. Nêeşkena debara xo bikerî, kitaban bigîr. Berzbîyayîşê krîzê ma tede yê nîşan dano. Ganî hukmat îstîfa bikero. Vengdayîşê îstîfayî ca de yo. Ganî Amedîjî zî nê çalakî bikerê.

	 

	Kedkara keyeyî Sabîha Esmer: Merdimî feqîr ê. Merdimî vêşanî ra mirenê. Her çî zaf vay o. Ma nêeşkenê debara xo bikerê. Wa Homa heqê ma înan rê nêverdo.

	 

	'Ma nêeşkenê rûn û şekir bigîrê' 

	 

	Kedkara keyeyî Muzeyyene: Hukmat nêmendo. Nika 15 hezar TL bidê karkeran zî qîm nêkeno. Tirkîya de her çî qedîyayo. La kes nê nêzano. Ma sey welat her çî tebera gênê. Hukmat çin o. Ma nêeşkenê rûn bigîrê. Ma nêeşkenê şekir bigîrê. Kes nêeşkeno çîyêk bigîro. Wa hukmat îstîfa bikero. Heme sîyasetmedarî kewtê derdê xo. Merdimî nêeşkenê nan berê keyeyê xo. Her kes deyndar bîyo. Dewlete heme kesî deyndar kerda. Mi kredî ant la nêeşkena bidî."

	 

	'Pere çin o'

	 

	Wendekara unîversîte Derya Gemîcîoglu: Ma wendekarî zaf zehmetî ancenê. Ma hem xebityenê hem zî wanenê. Semedê hukmat her çî normal o. La semedê nê normal nîyo. Ciwanî şîyayeyê xo zî nêeşkenê peyda bikerê. Ez serê siba şina wendegeh, dima ra zî şina kar. Ez şan de yena yurd. Ez wazena bigeyrî la pere çin o."

	 

	'Xebera kesê mirdî yê vêşanan rê çin a'

	 

	Ayten Sir a teqawîte: Merdimî perîşan bîyê. Ez nêeşkena debara xo bikerî. Her kes bêkêf o, hizûr çin o. Problemê weşîye zêde bîyê. Zûran kenê. Ma krîzê ekonomî ciwîyenê. Ê zî qesre de ronişnenê. Xebera kesê mirdî yê vêşanan ra çin a. Ganî her kes vejîyo kuçeyan. Ganî weçînayîşê rew bêro kerdiş. 20 serrî yo merdimî perîşan bîyê.”

	 

	'Nan nîyo 4 lîra'

	 

	Zevdet Çinar: Debare nêbena. Ma vêşanî ra mirenê. Nan resayo 4 lîra. ma kîra de yê. Serrê vîyarte de keyeyê ma rijnayî, hacetê ma talan kerdî. Ma eştî teberê bajarî. Ma rezîl bîyê. Nika ma bi vêşanîye terbîye kenê.

	 

	'Rûn çin o, ez nêeşkena werd amade bikerî' 

	 

	Kedkara keyeyî Esmer Yilmaz: Wa Homa heqê ma Erdoganî rê nêverdo. Ma nêeşkenê tu çîyêk bigîrê. Semedo ke keye de rûn çin o ma nêeşkenê werd amade bikerê. Keye de çîyêk çin o, ma do çi viraznê. Ma vengdayîşê îstîfayî bikerê do virazyo. Hukmat çin o. Eke bibayîne do na rewşe çinîbibayîne."

	 

	'Ez nêeşkena kitaban bigîrî'

	 

	Wendekara unîversîteyî Mujde Han: Bi yew vatişî vana ke ma nêeşkenê  debara xo bikerê. Ez wendekar a nêeşkena kitabanê xo bigîrî. Pereyê dayîka mi semedê şîyaye dana qîm nêkeno. Ma ne wezaret ne zî cayêk bîn ra paştdayîş nêgînê. Her kes vêşan o, ganî bikewê kuçeyan û îtîraz bikerê."