Merdimê tepişteyan bi endîşeyîn ê 

2021-11-22 13:45:20


	 

	 

	ÎZMÎR - Merdimê tepişteyan dîyar kerdî ke Mudurê zîndanê Kiriklar ê Bucayî Haydar Alî Ak ke newe ameyo tayînkerdiş, metodê resayê  îşkence bi ca ano û dîyar kerdî ke wa rayaumumî bala xo bido zîndanan.

	 

	Binpaykerdişê heqan ê zîndanan her ke şino zêde beno. Bi pandemîyî dir şert û mercê zîndanan tewr giran beno. Merdimê tepişteyan dîyar kerdî ke zîndanê Kiriklarî ê Bucayî de tedayê serê tepişteyan zêde bîyê, muduro newe Haydar Alî Ak teda zêde kerdo.

	 

	Dayîka Firat Yagmekan ke koxuşê F-2 de maneno, Sultan Yagmekan vat, lajê ci pêvînayîş de vato, ‘mudurê newe Haydar Alî Ak teda zêde kerdo, tepişteyî yewbînan ra cîya kerdê û her serê sibayî erzenê serê koxuşan."

	 

	'Sozê ke ameyî dayîş bi ca nêardî'

	 

	Sultane dîyar kerd ke tepişteyî caardişê vera mudurî de xo ver danê û vat: "Tepişteyî vera tedayan kewtî grev û vatî waştişê înan bi ca bîyarê. La mudur sozê ke dayî bi ca nêard. Lajê mi vat, ‘Ma da dês û berî ro ma xo ver da. Ma werd nêwazenê, kêm zî bidê xem nîyo. Vêşanî semedê ma zehmetî nîya.'  Rayaumumî hemverê zîndanan de bêveng a. Ez veng dana parlamenter û avûkatan. Wa heme dinya vengê ma biaşnawo. Bi serrêke yo ez lajê xo nêvînena. Zîndanan de tedayî zaf zêde bîyê. Heme zîndanan de eynî problemî estê. Ma azadîya tepişteyan wazena."

	 

	'Çar tepişteyî berdê' 

	 

	Merdima tepişteyî Nazli Daghan ke bi telefonê bi birayê xo Halîs Daghan dir qisey kerd û Halîsî zî vato, gardîyanî her serê sibayî erzenê serê koxuşan û kamerayan bi ca kerdê. Nazlî nê çî vat: "Muduro newe Haydar Alî Ak caardişê xirabî şîdetî keno. Erzenê hucreyan. Mudûrê newe tehdîd û tedayan keno. Çar embazî koxuşî ra berdê. Yê ke mendê zî tehdîd kerdê. Pêvînayîşan de qiseykerdişan goşdarî kenê. Semedê qiseykerdişan reyan dewa akenê. Ma muracatê ÎHDyî kerd. Wa her kes bizano, bêveng nêmano."

	 

	'Tepişteyê nêweşan rê îşkence' 

	 

	Merdima tepişteyê ke nêwaşt nameyê xo bido vat, tepişteyo bi nameyê Îbrahîm Dîkan ke gardîyanan berdo koxuşêk bîn xebere ci ra nîna girewtiş û hîn tepişteyan kenê hucreyê sey qefes yeno binamekerdiş, bica kenê. Sewbîna dîyar kerdî ke tepişteyê nêweşî Mehmet Siddik Bîçer û Omer Aslan kerdê binê karantîna, la odaya karantîna de nêbîyê û wina qedêna: "Îsmet Guldem yê nêweşê şekir, gurçik, tansiyon û diyabetî yo û 60 serrî yo 10 rojî zêdeyêr o hucreyê yew kesî de yeno tepiştiş û cuya ci tehluke de ya."