Emîneya ke qartonan arêdana hemverê krîzî têkoşîn kena 

2021-11-17 12:50:10


	 

	Medya Uren

	 

	MÊRDÎN - Emîne Çarkici semedê 4 tutanê xo û mêrdeyê xo yo ke nêweş o biewno qartonan arêdana, karê pakitî kena û turîstan gêrnena. Emîneya ke bêvindertiş xebityena vana: "Ez her roje fikirîyena gelo senîn tutanê xo mird bikerî."

	 

	Semedê polîtîkayê şaşî yê îqtidarê AKP-MHPyî, krîzê ekonomî kûr beno û welatî tewr feqîr benê. Êdî hûmara kesê ke qarton, bermendiş û laylonan arêdanê tewr zêde bena. Nê ra zêdeyêr merdim nê prosesî de mimkuno ke rastê kesê ke kuçeyan de rakewenê zî bêrê. Emîne Çarkici (46) ke Mêrdînê kanî, kuçeyê Bazarî de bi keyeyê xo dir ciwîyena, semedê debara keyeyê xo û mêrdeyê xo ke nêweş o bikero, qarton û bermendişan arêdana. Mîyanê krîzê bîyaye de Emîne têkoşînêk pîl ê cuye dana. Semedê bi hezaran feqîrê Tirkîya û herême nê nimûneyêk ê.

	 

	24 saetê Emîne bi kar derbaz beno

	 

	Her ke şino krîz kûr beno û hûmara feqîran zêde bena. Sey xeylêk kesî vanê, feqîrî tewr benê feqîr û dewlemendî zî tewr benê dewlemend. Bi kilmî sîstem dewlemendan rê xebitya. Seke ma sere de zî ramojna her kuçe mimkun o ke ma cinî û tutê ke bi çop debara xo kenê, yan zî kuçeyan de konê ra vînenê. Emîne Çekîcî zî nê cinîyan ra yewa ke Mêrdînê kanî de semedê her tutan a. Mêrdeyê aye zî nêweş o. Aye vera ke tutî wurzê  kuçeyan ra qartonan kom kena û yena keye werdê xo amade kena. Dimayê pakitîya keyeyî û ewnîyayîşê keyeyê xo aye reyke bîn zî vejêna kuçeyan. Ge-ge karê pakitîyê keye bibo, pakitî kena. Eke çinî bo zî turîstan gêrnena, yan zî qartonan kom kena. Wextê werdê şanî xo resnena keye. Aye tim wina dewam kena. Semedê tutanê xo û mêrdeyê xo îhmal nêke ro bi program têgêrena.

	 

	'Mi çîyêk xirab û parsekî nêkerdo'

	 

	Xeylêk cinî sey Emîne estê. La semedê tedayê sîyasî û komelî nêeşkenê qisey bikerê. Wexto ke Emîne taqîb kenê zî ma benê şahidê vatişê çewt yê kesan û qeşmerîyê tutan yê hemverê ci. Aye nê ser de ma ra vana: "Ez cayê 10 camêrdan de xebityena, heta nika mi çîyêk xirab û  parsekî nêkerdo. Mi nêverdayo tutê mi  zî mihtacê kesî bibê. Yê ke çîyêk xirab vajê zî şerm û gunayê înan o."

	 

	'Her çî hende vay bîyo'

	 

	Emîne mîyanê têkoşînêk pîl de ya. Coka aye zî rewşe ra gerreyox a. Pêwa heme çî nêeşkena debara xo bikera. Aye vana ez bi vermendişê şarî  cilan dana xo ra û tutanê xo ra û wina vat: "Ma mîyanê feqîrî de ameyî dinya la her ke şino ma tewr zêde feqîrî vînenê. Ez reyke bieşkî kîraya keyeyê xo bidî, ez a roje ra kewena endîşeyê aşma bêro. Ez o senîn tutanê xo ewro zî mird bikerî fikiryena. Ez zî tena destê xo û linganê xo xebitnena. Ez tim endîşe de ya. Her çî hende vay bîyo ke ez bawer a xeylêk kesî sey mi estê."