'Hêrişê serê Dayîkanê Aştîye fehmê dewlete ramojneno' 

2021-11-09 14:53:16


	 

	 

	Medya Uren

	 

	AMED - Dadîya Dayîka Aştîye Wesfîye Yigit ke polîsan eşt serê keyeyê aye, dîyar kerd ke hêrişê serê Dayîkê Aştîye fehmê dewlete ramojneno û wina vat: "Tehemulê înan hemverê kurdan çin o. La lazim o ma hemverê înan de her wext wurzê û sere nêtewênê."

	 

	Dayîka Aştîye Wesfiye Yîgît (58) keyeyê xo yê Baglara Amedî de hetê polîsan ra ameye destbendkerdiş. Polîsan bi saetan keyeyê Wesfiye ke nêame zanayîş semedê çi ameya destbendkerdiş, gêrayî. Eşyayê keyeyî ameyî vilakerdiş. Dadîya Wesfîye, Halîse Ekîncî derheqê hêrişê serê Dayikê Aştiye bi ajansê ma dir qisey kerd û vat, no fehmê înan ê hemverê aştî ramojneno.

	 

	'Nêverdayî awe zî bişimino' 

	 

	Halîse vat, wexto ke polîsan eşto serê keyeyî ê serê nimêjê serê siba de bî û nimajê înan nîme de ameyo verdayîş. Halîse wina vat: "Ma sey kurdî çi heyf musayê tehdîdan. Labelê her ke şino zî ma çîyê newe înan ra vînenê. Wesfîye nêweşîyê aye estê. Lazim bi ke keye de dermanê xo biwerdêne, la destûr nêdayî, xora destûr nêdayî awe xo zî bişimino. No zulm o û hemverê dayîkêke bêrêzî yo."

	 

	'Ma hemverê înan aştîwaştox ê'

	 

	Halîse dewam de wina vat: "Dayîkê ma tena aştî wazenê. Oxirê aşitî û hizûrê heme şaran de kedêke pîl danê. Bi serran o semedo ke gonî nêrijîyo kuçeyan de yê. No kulturê înan ê hezar serran o û nika zî ê danê dewamkerdiş. No zî aştîwaştoxîyê şarê ma mojneno. Coka her wext hêrişê hemverê helwestê dayîkê ma bî û ewro zî nê helwestê xo ramojnayî."

	 

	'Lazim o ma hemverê înan wurzê'

	 

	Halîse tewr peyîn wina vat: "Ê aştî nêwazenê. Semedê nê zî tehemulê înan dayîkanê ma rê çin o. Ez hêvî kena ke herkes nê çî bivîno û vera nê wurzê. La ma do heta key vera nê zulmî de bêveng bimanê. Ganî şar bi xoverdayîşê xo nê çî bido vindernayîş. Ma baş bizanê ke heta ma nêwurzê hêrişê înan zî dewam bikerê."