Dayîka tepişteyî: Mîyanê çar dêsan de zulm kenê 

2021-11-08 13:47:40


	 

	 

	AMED - Mehmet Işiktaşo ke Zîndanê Ereglî Konyayî de maneno, ame zanayîş ke ameyo derbkerdiş û ameyo surgunkerdiş. Dayîka ey Kamîle Işiktaş dîyar kerd ke lajê aye surgun kerdê, nêverdayê cilanê xo xo pay bikero û vat, tutê înan zîndanan de ê zî tebera binê zulmî de yê.

	 

	Binpaykerdişê heqan yê zîndanan dewam kenê. Teda, şîdet û îşkenceyê hemverê tepişteyan resayo sewîyeya tewr cor, xeylêk tepişteyî surgunê zîndanê bînan yenê kerdiş. Tepişteyo bi nameyê Mehmet Işiktaş ke Zîndanê Tîpê T yê Amedî de tepişte bi, surgunê zîndanê Ereglî Konya ame kerdiş. Keyeyê ci wexto ke şino pêvînayîşê girewte musenê ke Mehmet ameyo surgunkerdiş û pêvînayîşê telefonî yê bi Mehmetî dir, musenê ke Mehmet ameyo derbkerdiş û ameyo tehdîdkerdiş. Dayîka ci Kamîle Işiktaş dîyar kerd ke seba sedemê ekonomî nêeşkenê şêrê Konya û reaksîyon nîşanê rewşe da û vat, pêwa tepişteyan zulm keyeyan rê zî kenê.

	 

	'Cezaya lajê mi hema dîyar nîya' 

	 

	Kamîle derheqê babete de wina vat: "Ez 53 serrî ya seba hewcedarîyê lajê xo şina keyan pak kena. Ma şî pêvînayîş ma dî ke Mehmetî surgun kerdê. Verê qet nêbê ma şîne zîndanê Amedî ma dîne. La pêwa ke 4 mengan ra reyke roniştişê lajê min o, cezaya ci hema nêameya dayîş. Vera roniştişê 3in bêro kerdiş, surgunê Konyayî kerdî. Wexto ke surgun kerdê, nêverdayê cilê xo zî xo ra bido. Nêverdayî tu eşyayê xo bigîrê. No zulm o. Nê feqîrî de ez o senîn biewnî lajê xo ra."

	 

	'Keyeyî nêeşkenê tutanê xo bivînê' 

	 

	Kamîle dewam de wina vat: "Semedê krîzê ekonomî keyeyî zaf tesîr benê. Pereyê rayîrî zaf vay o. Merdimî nêeşkenê şêrê tutanê xo bivînê. Tutê ma her wext vîrê ma de yê. Xeylêk reyan tutê ma teyşan û veşan verdenê. Roja ke lajê mi ameyo tepiştiş, ez werdê ke ci ra hes keno nêviraznena. Semedê tutanê xo ma şandînan nêkewenê ra. Ma zere de binê zulmî de yê ma zî teber de binê zulmî de yê."

	 

	'Ganî peynîya zulmî bîyarê'

	 

	Kamîle bale ant serê binpaykerdişan û vat: "Lajê mi her rey gêreno, vano erzenê serê koxuşan, gardiyanî şîdet kenê, kitaban parçe kenê. Tutanê ma kerdê mîyanê çar dêsan û zulm ci kenê. Gelo kam nê caardişanê kêfî qebûl keno. Dewlete çira nê zulmî bi ma kena. Ganî peynîya nê zulmî bîyaro."

	 

	Do nêvejîyo pêvînayîş

	 

	Mehmetî keyeyê xo rê wina neql kerdibi: “Zor bi mi kerdî ke berê koxuşê edliyan. Mi qebûl nêkerd. Mi derb werd. Mi nêbenê koxuşê sîyasiyan.  Coka ez pêvînayîşê hewtane yê telefonî û pêvînayîşan protesto kena. Heta waştişê mi bi ca nêrê ez o dewam bikerî."

	 

	Keyeyê Mehmetî dîyar kerd ke ê semedê na rewşe xeylêk bi endîşeyîn ê û vengdayîşê paştdayîşî huqûqnas û heqê merdiman kerd.