'Çîyê ke cinîyê Efrînîjî ciwîyenê girêdayê tecrîdî yo' 

2021-11-07 14:34:21


	 

	 

	RIHA - Cinîyê HDPyîjî dîyar kerdî ke hêrişê hetê Tirkîya û komê ke paştdayîşê înan vînenê girêdayê tecrîdî yo û vengdayîşê yewbîyayîşê hemverê hêrişê cinîyan kerdî.

	 

	Rêxistinê Komelê Sivîl ê Efrînî derheqê sûcê ke Tirkîya û komê ke paştdayîşê înan kenê, hemverê cinîyan bîyayîşê ke benê de 25ê teşrîna verêne de raporêk eşkera kerd. Rapor de ame vatiş ke 18ê Adara 2018 de heta nika 84 cinî hetê çeteyan ra ameyê remayîş, ameyê qetilkerdiş û 6 heb zî ver bi întîxarî berdê, hezar heb zêdeyêr zî ameyê remnayîş. Aqûbetê cinîyê ke ameyê remayîş nîno zanayîş û pêwa nê zî bajarî de çeteyan tecawuzê 71 cinî kerdî. Cinîyê endamê Partîya Demokratîke ya Şaran (HDP) ê Rihayî hêrişê bajaranê Rojawanî de yenê kerdiş, şermezar kerdî û dîyar kerdî ke serebûtê ke Efrîn de yenê kerdiş girêdayê tecrîdî yê.

	 

	'Çîyê ke Şengal de kerdî nika Efrîn de kenê'

	 

	Hemsereka HDPyî ya Hewegî ya Rihayî, Rabîa Arslan vat, AKP-MHP her wext eynî polîtîka kenê û vat: "Yê ke wazenê şeran de destkewtiş bidest bikerê, vernê de cinîyan çin kenê. Bi no hawa cinîyan qir kenê, qetil kenê û wazenê bi no hawa hîn çîyan bikerê. Nika reyna wazenê ke bi zulm û teda cinîyan pelçiqnê. Cinîyê ke Şengal ra remnayî, bazaran de rotî. Polîtîkayê lêşin yê Şengalî hemverê cinîyan kerdî, nika Efrîn de hemverê cinîyan kenê. Nê polîtîkayê lêşin bi taybetî bajarê kurdan de zî yenê kerdiş. Serebûtê fuhuş û tîryakî yê Colemêrg, Sêrt û Êlih de yenê ciwîyayîş merdimî keno xof. Îqtîdar bi no hawa wazeno ke cinîyan wareyê erc û wareyê sîyasî ra dûr bifîno."

	 

	'Semedo ke Kurd ê yenê remnayîş'

	 

	Hemsereka HDPyî Pirsûsî Emîne Kaya zî dîyarkerd ke remnayîşê cinîyan ê Efrînî demê peyîn de zêde bîyê, cinîyê ke yenê remnayîş zî semedo ke kurd ê hedef yenê girewtiş. Emîne wina dewamkerd: "Seranserê dinya bi taybetî welatê Rojhelatê Mîyanên zî yenê binpaykerdiş. Cinî tena bedenê înan nîno binpaykerdiş. Kede û destkewtişê înan zî yeno çinkerdiş.  Cinîyê ke bi serran o problem ciwîyenê, hetê camêrd û çeteyan ra yenê qetilkerdiş. Remnayîşê cinîyan girêdayîşê tecrîdî yo. Dewlete dîn kena hacetê sîyasetî. Ganî rêxistinê komelê sivîl yê Rojawan û Tirkîya hemverê remnayîşê cinîyan bêveng nêmanê û semedê vernîya serebûtî bigirî ganî xo rêxistin bikerê.”