'Awa kanalîzasyonî danê tepişteyan'

2021-11-03 13:29:31


	 

	 

	WAN - Hemsereka TUHAY-DER ya Wanî Kudret Temel dîyar kerd ke a derheqê binpaykerdişê heqan ê zîndanan de xeylêk muracatî girewtê û vat, zîndanê Tîpê L yê Panosî de awa kanalîzasyonî sey awa şimitişî dayê û werdê seba kesêkê çar kesan rê vila kenê.

	 

	Tecrîdê Îmraliyî 22 serrî yo dewam keno û tesîr serê heme zîndananê herême û Tirkîya de keno. Goreyê raporê rêxistinê komelê sivîl û heqê merdiman, zîndanan caardişê surgun, cigêrayîşê viran, nêdayîşê hewcedarîyê sereyîn, sereştişê koxuşan, îşkenceyê odaya sungerî, astengkerdişê heqê dermankerdişî û veşnayîşê înfazî xeylêk yeno ciwîyayîş. Zîndanê Tîpê F yê Wanî û zîndanê Tîpê Lyê Panosî de ame zanayîş ke tepişteyan bi hemkarîya keyeyê xo caardiş neql kerdê. Hemsereka Paştdayîş û Hetkarîya bi Keyeyê Tepişteyan dir (TUHAY-DER) ya Wanî Kudret Temel derheqê babete de qisey kerd û vat, demê peyîn de xeylêk muracatî ameyê kerdiş.

	 

	'Tepişteyê ke caardişan qebûl nêkenê bi şîdetî dir rî bi rî manenê' 

	 

	Kurdrete dîyar kerd ke derheqê binpaykerdişê heqan de demê  peyîn de xeylêk tepişteyan muracat kerdo û binpaykerdiş dewam keno.  Kudrete wina vat: “Hewcedarîyê sereyîn ra bigîrê, heta aktîvîteyê komelî de mudaxale esto. Tepişteyê ke nê caardişan qebûl nêkenê zî yenê derbkerdiş û yenê surgunkerdiş.”

	 

	'Tu hetê qanûnî çin o'

	 

	Kudrete vat, pandemî kenê bahane û tepişteyan tecrîd kenê û vat: "Îdare û wezîfedarî qanûnê bîyaye bi ca nêanê. Semedê xeylêk tepişteyan cezaya giran ameya dayîş. Heqê tepişteyan ê neqlkerdişî yeno astengkerdiş. Kovar, kitab û rojname nînê dayîş. Nê kerdişan ser o tu hetê qanûnî çin o."

	 

	'Awa şimitişî awa kanalîzasyonî ya'

	 

	Kudrete bale ant serê problemê Zîndanê Tîpê L yê Panosî û ke awa kanalîzasyonî danê tepişteyan û wina vat: "Werdê semedê kesêk danê 4 kesan. Hîjyen zîndanan de çin o. Kapasîteyê zîndanan zêde zêde yo. Kantînan de her çî vay roşenê. Ma wazenê ganî fek nê caardişan ra vera bidê."

	 

	'Keyeyî zî yenê mexdurkerdiş'

	 

	Kudrete dewam de wina vat: “Tepişteyî bi kîlometreyan keyeyê xo ra dûrî yê. Semedê sebebê ekonomî nêeşkenê şêrê verê tepişteyan. Tu ameyîşêk keyeyan çin o. Nêeşkenê tepişteyan rê cil û belgan bigîrê. Muracatê ma kenê paştdayîş wazenê. Zere de tepişteyî teber de keyeyî yenê mexdurkerdiş."

	 

	'Heta tecrîd peynî nêbo binpaykerdişî zî peynî nêbenê'

	 

	Kudrete wina qedêna: “Tedayo ke bîyo zêde, cuye zî tecrîd keno. Bingehê probleman de tecrîdê serê Abdullah Ocalanî esto. Heta tecrîdê Îmraliyî peynî nêbo, nê binpaykerdişî zî nêvindenê. Sebebê binpaykerdişan tecrîd o. Ganî tecrîd bêro wedaritiş."