Merkezê Kulturê Aryenî de perwerdeyê kultur û hunerî 

2021-11-02 11:56:56


	 

	WAN - Binê sîwanê Komeleya Cigêrayîş û Kultur û Hunerî ya Aryenî de semedê tutan atolyeyê ke ameyî destpêkerdiş de perwerdeyê hunerî yê bi ziwanê dayîke yeno dayîş. Hedefê komela oyo ke kulturê kurdan bidê ciwîyayîş û bi perwerdeyê ke danê tutan orkestra awan bikerê.

	 

	Wan de Komeleya Cigêrayîş û Kultur û Hunerî yê Aryenî, bi amancê kulturê kurdan bidê ciwîyayîş, bi ziwanê dayîke perwerdeyê xo dana. Komela de dersê; keman, pîyano, gîtar, erbane, saz, resim yenê dayîş. Sewbîna semedê tutan atolyeyan zî kenê. Mabêne emrê 2-5 de perwerdeyê rîtîm û nota yenê dayîş. Mamosta Fadîme Polat, derheqê perwredeyî de qisey kerd.

	 

	'Ma resamanê newe resnenê'

	 

	Fadîme wina qalê muhtewayê perwredî kerd: "Komeleya Aryen bi pêroyî xebatanê kulturî kena. Ma faliyetê muzîk û resimî kenê. Wareyê resamî de her emrî ra kesî estê. Ma resamê newe resnenê. Kursê muzîkî zî dest pêkerdî. Xebatê orkestra zî estê. Serê emrê 2yîne de semedê her kesî perwerde yeno dayîş. Ma serê emrê 7ine de zî perwerdeyê enstrumanî danê."

	 

	Hedef awankerdişê orkestra yo 

	 

	Fadîme qiseykerdişê xo wina dewam kerd: "Ma mabêne emrê 2-5ine de perwerdeyê formatî danê. Bi kay û xebatê rîtmîk, deyîranê kurdkî bi tutan danê heskerdiş. Ma perwerdeyê pîyano, gîtar, bilûr û sazî danê. Ma wazenê tutanê xo ra komêke orkestra awan bikerê."

	 

	'Semedê perwredeyê kurdkî eleqe zêde yo' 

	 

	Fadîme tewr peyîn wina vat:  “Kesê ke Kurdkî nêzanê yenê vanê, 'Şima bi kurdkî perwerde danê.' Waştişê înan zî perwerdeyê Tirkî yo. Ma wina vanê; ma vera perwerdeyê bîyaye yê kurdkî danê. Serê kurdî de waştiş zaf zêde yo. Koma orkestra ma ya Aryen esta. Amancê ma hûmara cinîyan zêde bibo. Na babete de xebatê ma dewam kenê."