'Tecrîd serê pêro komelî de tesîr kerdo'

2021-11-02 11:26:40


	 

	 

	
		AMED - Cinîyan dîyar kerd ke tecrîdê serê Rayberê PKKyî Abdullah Ocalanî dewam keno, tesîr serê heme komelî kerdo û ganî polîtîkayê tecrîdî peynî bo.
	
		 


	Rayberê PKKyî Abdullah Ocalan 22 serrî yo zîndanê Tîpê F yê Asayîşê Berzî yê Îmraliyî binê tecrîde de yeno tepiştiş. Muracatê avûkatan ê semedê pêvînayîşî her rey bi bahaneyê cîya yenê redkerdiş û avûkatan dîyar kerdî ke menga çeleyî de cezayêke dîsîplînî yê newe Abdullah Ocalanî rê ameya dayîş. La no prosesê qedexeyî pêwa ke 23yê adare de pirr bi zî muracatê avûkatan nêame cewabkerdiş. Reyna vejîya werte ke 14ê êlule 2018 de demê faliyetê sporî de bi bahaneyê volta eşto 3 mengî pêvînayîşê bi keyeyî dir ameyo qedexekerdiş.

	 

	Îdarekara Komeleya Paştdayîşî û Hetkarîya bi Keyeyê ke Merdimê xo  Dergûşê Şaristanîyan de Vînî kerdê (MEBYADER) Halîme Topuz û Sema Seydaoglu bale antî serê tecrîdî û dîyar kerdî ke tecrîd sûcê merdimayî yo, hukmat bi rayîrê tecrîdî hewl dano şarê Kurdî bipelçiqno.

	 

	'Wazenê sere bêro tewênayîş'

	 

	Halîme Topuz dîyar kerd ke tecrîd serê heme Kurdan de kerdo û wina vat: "Vernîya binpaykerdişê heq û huqûqê kurdan nîno girewtiş. No heme seba tesîrê tecrîdî yo. Dewlete hemverê kurdan de helwestêk dişminî mojnena ra. Tecrîdê serê tepişteyan û Kurdan de yeno kerdiş yewbînan ra cîya nîyo.  Tecrîdo ke yeno kerdiş, tesîr serê ekonomî de zî keno. Semedê ekonomî merdimî nêeşkenê debara xo bikerê. Wazenê şexsê Abdulllah Ocalanî de şarêke terbiye bikerê. Bi her het ra tedayan kenê. Wazenê bi şarî sere bidê tewênayîş. Zulm bi tutanê ma kenê."

	 

	'Nêverdenê ma bikewê têkîlî'

	 

	Halîme tewr peyîn wina vat: "Tepişteyan rê îşkence yeno kerdiş. Tutê ma vanê ke ma binpaykerdişê heqan dir rî bi rî manenê. Key biwazê erzenê serê koxuşan. Gardîyanê ke erzenê ser çi biwazê desteser kenê. Eynî wextî de tecrîdê ke kenê zî psîkolojîyê tepişteyan xira kerdê. Wa peynîya nê polîtîkayan bîyarê."

	 

	'Ciwanan kenê mîyanê fuhuş û tîryakî'

	 

	Sema Seydaoglu zî serê tecrîdî vinderte û vat: "Bi tecrîdî dir nêeşkenê bi şarî û tepişteyan peyser game bidê eştiş. Zîndanan de polîtîkayê tecrîdî serê tepişteyan de yeno kerdiş. Werdê ke danê tepişteyan qet baş nîyê. Xeylêk rey tepişteyî werd nêwenê. Xeylêk rey kantîn ra gêna. La xidayê kantînî zî zaf vay ê. Eynî wextî de teber de zî xeylêk ciwanê ma semedê feqîrî kewenê fuhuş û karê tîryakî."

	 

	Sema wina qedêna: "Çira tecrîd kenê? Wa tecrîd peynî bibo. Bi hezaran cinî û tutî zîndanan de yê. Tepişteyê ke nêweşê rewşa înan giran estê. Keyeyê ke şinê pêvînayîşê tutanê xo zî rastê zulmî yenê. Xeylêk tepişteyî bêsuc tepişte yê. Êdî bes o, wa zulm bi Kurdan nêkerê."