Rêxistinê HDPyî yê Amedî: Ma do bi kongreya xo bibê cewabê hêrişan 

2021-10-31 12:40:53


	 

	 

	AMED - Rêxistinê HDPyî yê Amedî bi sloganê, “Ma bi hêzê xo yê rêxistinkerde tecrîd bişikinê, demokrasî awan bikerê" xebatê xo yê 3in kongre dewam kenê. Nevrîye Çur, dîyar kerd ke dewe bi dewe, qeza bi qeza û tax bi taxe fikrê şrî musenê û vat: "Bi fikr û waştişê şarî ma do tewr zêde rêxistinbîyayîşê xo xurt bikerê." 

	 

	Rêxistinê Partîya Demokratîke ya Şaran (HDP) a bajarê Amedî kongreya xo ya 3ine 14ê teşrîna verêne de bikero. Xebatê kongre bi sloganê, “Ma bi hêzê xo yê rêxistinkerde tecrîdî bişikinê, demokrasî awan bikerê" yeno kerdiş. Derheqê xebatê kongreye de endama Komîteyê Amedekar ê Kongreye Nevrîye Çur ajansê ma rê qisey kerd.

	 

	'Şar wayîrê HDPyî vejîya' 

	 

	Nevrîye dîyar kerd ke HDPyî pêwa teda û polîtîkayê AKP-MHPyî sere nêtewêneno û vat: "Faşîzm teda bi şarî keno. Bi taybetî zî kurdî, cinî, ciwan û hêzê demokrasî xo rê hedef kerdo. Demo ke sewîyeya faşîzmê AKP-MHPyî vejîyayo cor, organîzekerdişê kongreya ma bi mana ya. Vernîya kongreye ma fikrê pozîtîf şarî rê girewt. HDP Tirkîya de partîya hîrên a. Pêwa nê hende teda û hêrişan şarê Kurdî wayîrê partîya xo vejênê. Bi taybetî zî wayîrê vejîyayîşê cinîyan girîng o. Ma çend kampanya dabî destpêkerdiş, nê kampanyayan de xeylêk xebatê bi erjî ameyî kerdiş. Kampanyayê 'Semedê cinîyan edalet', 'Feqîrîyê cinîyan rê ney', 'Ma HDPyî her ca de yê' bi tesîr bî. Netîceyê nê kampanyayan de ma xeylêk pêşnîyazî şarî ra girewt. Nê pêşnîyazî bawerî, hêvî û hêzî da ma."

	 

	'Ma ewnîyayîşê sazgeh û dezgehê sîvîlî girewt' 

	 

	Nevrîye, dîyar kerd ke xebatê kongreye dewam kena: "Ma çarçewaya kongreya xo de ma xebatê xo dewam kenê. Semedê kongreye ma rêxistinbîyayîşê zî xurt kenê. Ma çarçewaya kongreye de şî serdayîşê dewe û qezayan. Pêvînayîşê bi şarî dewam kenê. Ma hem xoser xebityenê û hem zî pêroyî xebityenê. Ma şî serdayîşê Meclîsê Cinîyan ê DTSO, Baroyê Amedî, Komeleya Heqê Merdiman, Komeleya Huqûqnasan semedê Azadîye, Komeleya Cinîyan a Rosayî, komeleyê kultur û hunerî û xeylêk sazgeh rêxistinê Amedî. Ma pêşnîyazê înan girewt."

	 

	'Kongre do bendewarî û lazimîyê şarê Amedî rê bibê cewab'

	 

	Nevrîye dîyar kerd ke do kongre bendewarî û lazimîyê şarê Amedî rê bibo cewab û vat: "Ma wazenê rêxistin û îdareyêk bi hêz û xurt awan bikerê. Bi temamê 17 qezayan de ma bi rêxistinê xo rê pêvînayîş kerd. Kombîyayîşê şarî qezayan de ameyî kerdiş. Ma do bi hêz û hêvîyêke xurt şêrê kongre."