'Bi wedaritişê tecrîdî dir do têmînyabîyayîşê Tirkîya werte ra wurzo'

2021-10-30 13:51:23


	 

	 

	Sema Çaglak 

	 

	AMED - Sîyasetmedarê cinî dîyar kerdî ke tecrîdê hemverê Rayberê PKKyî Abdullah Ocalanî tesîr serê pêro wareyê cuye keno û vat: "Tecrîd hem zîndanan de û hem zî heme beşê komelî de bi tesîr o. Hemverê tecrîdî ganî têkoşînêk hempar bêro kerdiş."

	 

	Rayberê PKKyî Abdullah Ocalan 22 serrî yo Zîndanê Asayîşê Berzî yê Tîpê F yê Îmraliyî de binê tecrîdê giran de yo. Avûkatanê Abdullah Ocalanî dimayê 8 serrî 2-22yê gulane, 12-18ê hezîrane û 7ê tebaxa 2019 de pêvînayîş bi muwekîlê xo dir kerdibî. Reaksîyon û nêrazîbîyayîşê hemverê tecrîdî dewam kenê. Sîyasetmedarê cinî fikrê xo ardî ziwan û vatî, tecrîdê hemverê Abdullah Ocalanî hemverê heme beşê komelî de zî yenê kerdiş. Cinîyan ajansê ma rê wina qal kerdî.

	 

	'Her wareyê cuye de tecrîd esto'

	 

	Hemsereka Partîya Demokratîke ya Şaran (HDP) a qezaya Erxenî Mervan Yildiz, dîyar kerd ke netîceyê polîtîkayê tecrîdî de şar pêro wareyê komelî ra ameyo dûrvistiş û vat: "Tecrîd yeno manaya îzolasyon û dûrvistişî. Wareyê komelî, kultur û ekonomî ra dûr fîneno. Bi tecrîdê hemverê birêz Ocalanî huqûq yeno binpaykerdiş. Eke bi Abdullah Ocalanî dir dîyalog aver şêrê Tirkîya do mîyanê têmîyanbîyayîş ra bixelisyo. Bi taybetî hemverê tepişteyê sîyasî zî tecrîdêk esto. Prosesê pandemî de zî tewr zêde tepişteyî komelî ra ameyî îzolekerdiş. Bi bahaneyê  pandemî dir pêvînayîşê bi keyeyan dir ameyî astengkerdiş. Keyeyî nêeşkenê tepişteyanê xo bivînê. Hemverê tepişteyê sîyasî îşkenceyêk sîstematik yeno kerdiş. Nê pêro mîyanê xo de tecrîd hewênenê."

	 

	'Ganî Ocalan bi hawayêke fîzîkî azad bibo' 

	 

	Hemsereka Komeleya 78ine ra Halîse Batgî dîyar kerd ke tecrîd sucêkê merdimayî yo û vat: "Tecrîd eynî wextî de şerêkê bi psîkolojî yo. Îqtîdar her vatişêk komelî hemverê xo sey terorîst ramojneno. Tirkîya bi her hawayî kaosêk pîl esto û mîyanê xetimnayîşêk de yo. Çareserîyê nê xetimnayîşî tena bi rayîrê diyalogî çareser beno. Ganî bi birêz Ocalan dir diyalog aver şêro. Tirkîya encax bi nê hawayî eşkena nefes bigîro. Sewbîna ganî birêz Ocalan bi hawayêk fîzîkî azad bibo.”

	 

	'Çiqas bêvengî bibo hende teda û tecrîd zêde beno'

	 

	Tewr peyîn zî Hemsereka Partîya Herêmê Demokratîke (DBP) ya qezaya Rêzanê Amedî Remzîye Tek qisey kerd û vat: "Tecrîd xo bi serdestî, bêedaletî, bêhuqûqî mojneno. Xitimnayîşê polîtîkayê dewlete bi her tewir tesîr serê komelî de keno. Na pêro babete girêdayê kûrbîyayîşê tecrîdî yo. No het ra zî lazim o  ke tewr zêde cinî aya bibê. Ganî pey heqê xo şêrê û têkoşînê xo yê vera nê têmînyabîyayîşan pîl bikerê. Çiqas bêvengî bibo hende teda û tecrîd zêde beno. Ganî cinî hemverê polîtîkayê tecrîdî de xo bi rexistin bikerê û yewîya xo awan bikerê."