Bastêk û meşlûlê payîzê ereyî tewr weş ê 

2021-10-27 13:03:59


	 

	
		
			
				
					
						
							 
						
							 
						
							Medya Uren
						
							 
						
							MÊRDÎN - Mêrdîn de ver bi peynîya mewsîmê payîzî de demê engure  Mezrone ya. Na engure viraştişê bastêq û meşlûlan rê zaf baş a. Bi engura Mezrone cinî kulturê kanî sey her serre gane kenê. Demê viraştişê dims, bastêq û meşlûlan o, coka serê her banî de rengê înan zerrîya merdimî weş keno.
						
							 
						
							Herra Mêrdînî ke dewlemendîyêke pîl a, merdiman bi xo dir dana girêdayîş. Roniştoxê tîya xeylê xo bi ramitişî çîyan bi dest kenê. Semedê nê sebebî zî her mewsîmê serre de  rengê Mêrdînî cîya weş o. Bi taybetî semedê peynîya payîzî de wextê engure Mezrone yeno. Engura Mezrone semedê viraştişê bastêq û meşlûlan zaf baş a. Bi taybetî zî xeylêk kesî semedê bastêq û meşlûlan viraznê, xo varanê yewine rê verdenê. Nika engura Mezrone semedê bastêq û meşlûlî bêrê viraştiş yena arêdayîş û awa ci yena vetiş.
						
							 
						
							Viraştişê înan kedêke pîl wazeno
						
							 
						
							Viraştişê bastêq û meşlûlan kedêke pîl wazeno. Destpêk de rezê enguran yenê ramitiş..Bi taybetî zî semedê viraştişê dims, şarab, bastêq û meşlûlan zî engura Mezrone yena ramitiş. Dima ra yena arêdayîş û bi weşikî yena pakkerdiş. Semedo ke cinî keda xo ma dir pare bikerê û bi erjnê ma qezaya Kerborana Mêrdînî de yê. Ma benê mêmanê Şîrîn Kalkmaz, Wesfîye Toprak û Salîha Altekîn. Hema şan de ê dest bi amadekarîyan kenê. Engurê ke ameyê arêdayîş, yenê pakkerdiş. Odayê ke bi taybetî semedê vetişê awa engure ameyê viraştiş, yenê arêdayîş. Telîsî serê banî de bi lingan yenê pelçiqnayîş. Awa ke ci ra vejêna kenê satilan. Nika zî semedê gêrnayîşî amade benê.
						
							 
						
							Xeylêk kesî pabeyê peynîya payîzî manenê
						
							 
						
							Cinîyê ke ma bîyê mêmanê înan, semedê gêrnayîşî hîna rew wurzenê. Dest bi gêrnayîşê awa engure kenê. Gêrînayîşî de zî hîn herra sipî kerdê ci. Wesfîye ma rê wina vat: “Xeylêk kesan hema  destpêkê payîzî de dest bi viraştişê bastêq û meşlûlan kerdê. Labelê tîya de bi taybetî erey yenê viraştiş. Semedo ke ê pabeyê payîzê ereyê û viraştişê engura Mezrone vindertê.  Engura tewr weş e varanê ewilî de ya. Xeylêk kesî pabeyê ci yê. Nika engure virazyaya û ma dest pêkenê. Seke şima zî dî ma şewa verê da ser û nika zî ma dewam kenê. Quşxaneyê ma bi awa engure pirr a. Lazim o bêro nîme."
						
							 
						
							'Çiqas zehmet bo zî berardiş weş o' 
						
							 
						
							Salîha verê viraştişî de wina vana: "Ma vizêr ra goz û vamê xo amade kerdê. Ma hemine bi derzenî kerdê lawa. Ma do înan bidaliqnê. Heta ke wişk bê ma do verê vayî de verdê. Bi taybetî zî serê banê keyeyan de yenê daliqnayîş. Ma bi mojnayîşî şima rê qal kerd, çiqas kede wazenê şima benê şahid. Labelê çiqas zehmet bo zî peynî de weşîya ci esto. Ma bi nê rengî xeylêk berardişan vejenê."
						
							 
						
							'Verê ma serê rezan de mendêne' 
						
							 
						
							Şîrîna 86 serrî qalê verê û nika kerd û vat: "Bêguman ma verê tewr zehmetî antêne. Her ke şino îmkanî zêde benê û tehm çîyêk de nêmaneno. Ma verê şîne çol û cayê rezî de ma çadiran dayîne ro. Ma engure xo arêdayîne û uca de bastêq û meşlûlanê xo viraştêne. Heta çend rojan zî ma uca ra nêameyîne. Ma bi tutan uca de mendêne. Ma zehmetîyêk pîl antêne. La ma rê cîyayîêk bi. Nika wina nîyo, her kes ê xo keno."
						
							 
						
							Dimayê ke bastêq û meşlûlî ameyî daliqnayîş, mîyanê çend rojan de yenê komkerdiş û semedê zimistanî yenê wedaritiş. Heta zimistan qedêno zî nê yenê werdiş.