‘Îqtîdar têkoşînê cinîyan ra terseno’

2021-10-23 14:47:49


	 

	Sema Çaglak

	 

	AMED - Amed reaksîyonê hemverê cazaya ke Ayşe Gokkan rê ame birnayîş dewam keno. Cinîyan dîyar kerd ke dozger, hukm û dadgehe binê kontrolê îqtîdarê sîyasî de yê û vatî: "Ma hemverê polîtîkayê bi nê rengî tu wext peyser game nêerzenê. Ma do rêxistinbîyayîşê xo pîl bikerê.”

	 

	23in roniştişê dewaya Vervatoxa Demî ya Tevgerê Cinîyan ê Azadan (TJA) Ayşe Gokkan bi îdiayê "îdarekerdişê rêxistine","endamîya rêxistine" amebi akerdiş 9in Dadgeha Cezaya Giran ya Amedî de ame vînayîş. Dadgehe 30 serrî ceza Ayşe Gokkan rê da. Reaksîyonê hemverê ceza dewam kenê. Cinîyê Amedijî derheqê cezaya ke ameyq dayîş de fikrê xo ajansê ma rê pare kerdî.

	 

	‘Ma peyser game nêerzenê’

	 

	Aktîvîsta TJAyî Zulfîye Kîşmîr dîyar kerd cezaya ke semedê Ayşe Gokkan ameya dayîş, semedê pêro cinîyan ameya dayîş û vat: “Zîhniyetê îqtîdarî rêxistinê cinîyan û azadiya cinîyan ra terseno. Hemverê Ayşe Gokkan û heme tepişteyê sîyasî polîtîkayêk dişminî yenê kerdiş. Cinîyan sîstemê hişmendîyê îqtîdarî deşîfre kerdî. Îqtîdar ferq kerd ke bi têkoşînê cinîyan do komelêk azad û têduşt bêro awankerdiş. Semedê nê ma reyke bîn dî ke dozger, hukm û dadgehe binê kontrolê îqtîdarê sîyasî de yê. Ma hemverê polîtîkayê bi nê rengî tu wext game peyser nêerzenê. Ma do têkoşîn û rêxistinbîyayîşê xo tewr pîl bikerê. Cinî rayberîya komelî kena û bi têkoşînê xo cuye îdare kena. Coka sîstemo bîyaye cinîyan hedef gêno.'

	 

	‘Îqtîdar têkoşînê cinîyan ra terseno’

	 

	Femînîsta xosere Hande Sakarya zî wina vat: “Ma zanê ke Ayşe Gokkan bi hawayêke bê huqûq yena muhakemekerdiş. Pêwa nînan 30 serrî ceza dayî Ayşe Gokkan. Ma reyke bîn vînenê ke îqtîdar çiqas têkoşînê cinîyan ra terseno. Ma qalê dewletêke hemverê cinîyan şer daya destpêkerdiş kenê. Ma do hemverê polîtîkayê dişminî têkoşîn bikerê. Feshkerdişê Pêkerdişê Stenbolî, qedexekerdişê çalakîyê cinîyan ê femînîst, teda û zordariyê serê TJAyî heme nîşaneyê tersê îqtîdarî yo.  Labelê ma reyke bîn vanê ke hemverê nê polîtîkayan peyser game nêerzenê. Ma do paştdayîşê xo û têkoşînê xo bi qerar dewam bikerê.”

	 

	‘Ma do têkoşînê xo dewam bikerê’

	 

	Tewr peyîn zî aktîvîsta TJAyî Mîne Sir wina vat: "Ewro Ayşe Gokkan bi 30 serran yena muhakemekerdiş. Sebebê nê yê bingehîn zî bêtahamûlîyê têkoşînê cinîyan o. Nêverdayî Ayşe Gokkan pawitişê xo zî bikero. Ma nê qetî qebûl nêkenê. Ma sey cinîyê kurdî her wext verê embazanê xo yê tepişteyan de bê. Ma do hemverê qerarî helwestê xo xurt bikerê. Embazê ma zere de têkoşîn danê, ma do zî têkoşînê xo teber de bikerê.”