Keyeyê Fîkrî Demîrbaş ke wesayîtê zirxî da piro dewa ameye akerdiş 

2021-10-18 14:26:00


	 

	Şehrîban Aslan

	 

	
		AMED - 2017 de wesayîtê zirxî Fîkrî Demîrbaş da bi piro û dinyaya xo bedilnabi. Wezaretê karê zereyî keyeyê Fîkrî Demîrbaşî ra bi bahaneyê, ‘wesayîtê zirxî zirar dîyo’ dewa tezmînatî ya 250 hezar Euro akerd.
	
		 


	Goreyê raporê ÎHDyî yê menga êlule de eşkera kerdo, 10 serrê peyînî de 16 ci ra tutî 36 kesî netîceyê pirodayîşê wesayîtê zirxî de dinyaya xo bedilnayî. Yê ke qetil kerdî nêameyî cezakerdiş û vera nê kesê ke dinyaya xo bedilnayî yenê  cezakerdiş. 20ê Hezîrana 2017 de serê rayîrê Amed-Çewlîkî de wesayîtê zirxî yê cendermeyan ê tîpê kobra wesayîtê ke 5 kesî ci de bî, da piro.

	 

	Keye ra tazmînat ame waştiş

	 

	Wezaretê karê zereyî derheqê şoforê wesayîtê Fîkrî Demîrbaş ke ame qetilkerdiş de, keyeyê ci rê doza tazmînatî yê 250 hezar Euro (2 mîlyon û 669 hezar û 487,14 TL) akerd. 2019 de teblîg keyeyî kerd.  Wezaretî bi bahaneyê keye pere nêdayo 3in Dadgerîya Huqûqê Sulh ê Amedî dewaya tazmînatî akerd.

	 

	Oyo ke ame qetilkerdiş bi qisûr ame vînayîş

	 

	Waştişname de ame vatiş ke şoforê wesayîtê sivîlî Fîkrî Demîrbaş şerît îhlal kerdo û semedê nê qeza ameya meydan û Fîkrî Demîrbaş bi qusur ame vînayîş".

	 

	Oyo ke ame qetilkerdiş sey zirar ame vînayîş

	 

	Waştişname de wina ame vatiş: “Wesayîtê aîdê sazîyê ma pert (tam xesar) dîyo. Wesayîtê ma yê newe 350.000.00 Euro yo û rewşa vayîye bi zirar 100.000.00 Euroye kewto. Na rewşe de zirarê ci 250.000.00 Euro yo.  Dosyaya hûmara 2017-31 D yê 2yîn Dadgeha Huqûqê Sulhî ê Amedî 581.80 TL avansê şîyaye ameyo şawitiş û bi pêroyî 250.000.00 + 581,80 TL zirarê îstîmlakî ameyo tespîtkerdiş.” Her wina vat, vatî ke keyeyî 2019 ra tu pere nêşawito.

	 

	3in Dadgeha Huqûqê Asliyeyê Amedî dewa qebûl kerd û semedê dewa nuştiş şawit keyeyî rê.

	 

	Cinîya Fîkrî Demîrbaş, Halîme Demîrbaş reaksîyon vera dewa ramojna û vat: "Mêrdeyê mi, dayîka ci û hîrê merdimê ci pîya şîne Licê şîn. Agêrayîş de wesayîtê zirxî 5 kesî qetil kerd. Polîsan ame vat, qeza kerdê û berdê nêweşxane. Ma ra nêvatî merdo. Ez û tutê xo ma şî nêweşxane. Ma vatêne qezayêke normal a. Ma şî beşê lezgîn. Me dî ke cenazeyê 5 kesî potê sîya de pêşnayê. Tutê mi senî dîyî qîyamet wedarnayî. Dima ra ma musayî ke  panzere day apiro."

	 

	'Oyo ke merdo mêrdeyê min o la ceza ez dana' 

	 

	Halîme dewam de wina vat: "5 keyeyî mexdûr bî. Cuya ma vinderte. 8 tutê mi estê. Hîrê hebî zewicyayê. 5 heban zî ez ewnîyena. Keye kîra yo. Di mengan ra reyke  650 TL gêna. No pere qîmê çîyêk nêkeno. semedê mi û 8 tutanê mi cîya cîya teblîgat ame. Sebebê malê dewlete zirar dîyo, 250 hezar Euro yeno waştiş. Ma zanayîş da avûkatanê xo û ma eşnawit ke no bîyo dewa. Ez nêeşkena kîra bidî. Ez o nê perî senî bidî?"

	 

	'Kiştoxî ney yê ke ameyî qetilkerdiş yenê cezakerdiş'

	 

	Halîme tewr peyîn wina vat: "Tîya de 5 kesî ameyê qetilkerdiş. Pêwa nê keyeyê înan yenê cezakerdiş. Mêrdeyê mi wesayît xebitna. Vanê şerîde ra vejîyayo. La kameraya ê cayan çin a. Gelo kam ci panzer bê kamera ya. Semedê cezaya tezmînatî tutê mi cayêk de nêeşkenê bixebityê. Nêeşkenê bikewê karê bi sîgorta. Demê bixebityê zî semedê dewaya tezmînatî dest danê serê pereyê înan. Ez nika pers kena no wijdan o gelo? Dişmin zî no nêkeno. Ez û tutê xo ma do pey dewa vera nêdê."