Reaksîyonê hemverê zêdebîyayîşê îstîsmarê Wanî: Ma do têkoşînê xo dewam bikerê 

2021-10-14 13:33:52


	 

	 

	WAN - Cinîyê ke hemverê şîdet û îstismarê ke zêde bîyo de bale antî serê girîngîyê Pêkerdişê Stenbolî wina vatî: "Her camêrdê nê welatî ame a sewîye ke vanê, 'çîyêk bi mi nêbeno.' La do têkoşînê ma hemverê nê dewam bikero."

	 

	Camêrdê ke polîtîkayê bêcezaverdayîşî û pêwa pêro munaqeşeyan wedaritişê Pêkerdişê Stenbolî ke bi qerarnameyê serekkomarî ra cesaret gênê, hemverê tut û cinîyan de kuçe, keye, cayê karî de suc kenê. Demê peyîn de zêdebîyayîşê îstismar û şîdetê serê cinîyan de Wan de reyna rêxistinê cinîyan kerd mîyanê tevgerî. Cinî bi çalakîyê cîya dir nê çî şermezar kenê. Heta nika goreyê zanayîşê serê çapemenî de ameyî eşnawitiş tewr tay 6 tutî bi hêrişê cinsî rî bi rî mendî.

	 

	'Bi wedaritişê pêkerdişî ame waştiş ke cinî bibê mehkumê şîdetî'

	 

	Hemsereka Şaredarîya Artemêtî ya HDPyî Gulcan Kaçmaz ke vera ci qeyûm ameyo tayînkerdiş, dîyar kerd bi wedaritişê pêkerdişî camêrdan hêz girewto. Gulcane dîyar kerd ke demê îktidarê AKPyî de her tim şîdet, desteştiş, îstismarê vera tutan û cinîyan ameyî kerdiş û vat: "Bi wedaritişê pêkerdişî ame waştiş ke cinî bibê mehkûmê şîdetî."

	 

	'Wan de cinîyê ke rastê şîdetî yenê cayêke muracat bikerê çin o'

	 

	Gulcane wina vat: "Serebûtê îstismarî ke çapemenî de yenê mojnayîş, zêde yê. Wexto ke cinî şîdetî dir rî bi rî manenê, wareyê ke muracat bikerê hema hema vajê çin ê. Cinî bi şîdetî dir keyeyê xo de yenê hepskerdiş û yeno waştiş ke tena bêrê verdiş. Labelê ma mîyanê her şerd û mercî de heqê xo bipawê. Wexto ke cinî pîya têkoşîn bikerê do o wext biresê amancê xo."

	 

	'Camêrdî bawer kenê ke sey Mûsa Orhan çîyêk bi înan nêbeno' 

	 

	Hemsereka HDPyî ya Tûşbayî Hanim Akkuş zî bale ant serê  îstismarî û wina vat: "Şîdeto ke zêde bîyo tesaduf nîyo. No sîstematîk o. Mûsa Orhan semedo ke tecawuzê Îpek Er kerd û bi sebebê merdişê aye, nika serbest yeno muhakemekerdiş. Bi desan cinîyan semedê vatişê Mûsa Orhan tecawuzkar o ewro yenê muhakemekerdiş. Semedê parekerdişê derheqê înan de dewa yena akerdiş. Mûsa Orhan vatibi, 'Çîyêk bi mi nêbeno.' Coka camêrdî  bawer kenê ke sey Mûsa Orhan çîyêk bi înan nêbeno. Her camêrdê nê welatî ame sewîyeya vajê 'çîyêk bi mi nêbeno.' Labelê do têkoşînê ma vera nê dewam bikero."