Bi 50 rojî yo cenazeya Sanîye Toprak teslîmê keyeyê ci nîna kerdiş 

2021-10-12 15:06:53


	 

	 

	ŞIRNEX - Pêwa ke ser de 50 rojî derbaz bîyo zî cenazeya Sanîye Toprak ke Koyê Gabarî de şer de dinyaya xo bedilnaye, teslîmê keyeyê aye nîna kerdiş.

	 

	50 rojî yo cenazeya Sanîye Topraka YJA-STARî ke 23ê Tebaxe de Koyê Gabarî de şer de dinyaya xo bedilnaye, teslşmê keyeyê aye nîna kerdiş. Cenaze vernê de berdî Nêweşxaneyê Dewlete ya Şirnexî û hema netîceyê DNAyî nêvejîyayo, Taxa Bahçelîevlerî goristanê bêkesan de ameye definkerdiş.

	 

	Dozgerîya Şirnexî 14ê êlule de telefonê keyeyê Sanîye kerd ke şêrê Nêweşxaneyê Dewlete ya Dihê ya Sêrtî semedê DNAyî gonî bidê. Ferdê keyeyî semedê testê DNAyî şî nêweşxaneyî û 15ê êlule de zî Şirnexî de pêvînayîş bi dozgerî dir kerdî. Dozgerî keyeyî ra vat: "Kênaya ci ameya definkerdiş. Destê ma de dosyaya definkerdişî esta. La heta netîceyê testê DNAyî dîyar nêbo, ma cenaze nêdanê."

	 

	'Heta netîceyê DNAyî dîyar nêbo do cenaze nêro dayîş'

	 

	Keyeyê Sanîye dîyar kerd ke kênaya înan a, labelê dozgerî înan ra vato, heta netîceyê DNAyî dîyar nêbo do cenaze nêro dayîş û selahîyetdarê nêweşxane zî înan ra vato, do testê DNAyî mîyanê 20 rojî de dîyar bibo û gama ke dîyar bibo do înan haydar bikerê, labelê 28 rojî derbaz bîyo hema zî çîyêk înan ra nêameyo vatiş.