Semedê îşkenceyê dî qal kerd 35 rojî cezaya hucre ci rê ameye dayene 

2021-10-12 13:56:02


	 

	 

	ENQERE - Tepişteya bi nameyê Garîbe Gezer zîndanê Tîpê F yê Kandirayî de manena, hetê gardîyanan ra bi taciz û îşkenceyî rî bi rî mende. Dayîka ci Halîme Gezer vat, semedo ke kênaya ci derbazê koxuşê xoser bibê îşkence ci rê ameyo kerdiş û îşkence qal kerda, rastê 35 rojî cezaya hucre ameya.

	 

	Binpaykerdişê heqan yê zîndanan her ke şino tewr zêde beno. Zîndanê Tîpê T yê Şakranî yê Îzmîrî de zî binpaykerdişî her ke şinê zêde benê û erzenê serê koxuşan de. Tewr peyîn rewşa tepişteya bi nameyê Garîbe Gezer ke zîndanê Bunyan ê Kayserî ra berdibî zîndanê Tîpê F yê Kandirayî amebî rojeva meclîsî. Ame dîyar kerdiş ke Garîbe demêk derg bi îşkenceyê gardiyanan dir rî bi rê manena. Dayîka ci Halîme vat, kênaya aye cezaya muebetê giran girewta û derheqê rewşa ci de ajansê ma rê qisey kerd.

	 

	'8 rey surgun, 22 cezayê dewaya îstîmlakî' 

	 

	Halîme vat, Garîbe 3yê Adara 2016 de ameya tepiştiş û Zîndanê Mîdyadî ra şawitê Zîndanê Kutahya şawitê Mêrdînî, uca ra zî reyna şawitê Mîdyadî, uca ra zî Şakranî û Tarsûs û Bunyanî rê şawitê. Halîme wina vat: “Tewr peyîn surgunê Kandirayî ameye kerdiş. 6 serrî yo zîndan de ya surgunê 8 zîndanan ameya kerdiş. Cezaya muebetî giran ci rê ameya dayîş û 22 dewaya îstîmlakî ceza ci rê ameya dayîş. Nika 180 hezarî zî cezaya pere dayê. Dosyaya ci di serrî yo dadgerîye de ya û hema netîceyêk çin o. Nîno zanayîş ke dosya şîyê kam ci daîre. Tewr peyîn şîbî daîreyê cezaya 16in û dosya vila kerdê. Ma pabeyê tarîxê roniştişî yê."

	 

	'Koxuşê xoser aye rê ameyo ferzkerdiş' 

	 

	Halîme dewam de wina vat: “Şakran de semedê şêro verê tepişteyê sîyasî surgunê Tarsusî kerdî. Uca de binpaykerdişê heqan ame ciwîyayîş. Tarsus de koxuşê xoseran ame ferzkerdiş. Garîbe semedo ke qebûl nêkerd û binpaykerdişê heqan ma rê neql kerd cezaya hucreyî dayê. Sewbîna surgunê zîndanê Bunyanî kerdî. Zîndanê Kayserî de zî eynî problem ame ciwîyayîş."

	 

	'Waşt bi îdare dir pêvînayîş bikero la ameye derbkerdiş'

	 

	Halîme vat, Garîbe tewr peyîn surgunê Kandirayî ameya kerdiş û vat: "Garîbe vat, sebebê binpaykerdişê heqan îdareyê zîndanî yo. Semedê cezayê hucreyî bibî, 22 rojan hucre de mende. Hucre ra ameye vetiş, berdî hucreyê yew kesî. Waşt şêro verê embazanê xo, waştişnameyê ci nêameyî tesdîqkerdiş. Îdareyê zîndanî bi fekî vato, 'ma waştişname tesdîq nêkenê îdare nêwazeno to dir pêvînayîş bikero.' Garîbe nê qebûl nêkena û 7-8 gardiyanî aye derb kenê û erd ra yena kaşkerdiş. Cilê aye perçe benê. Gardîyanê camêrdî zî mîyan de bîyê. Kenê hucreyêk ke embazanê ci ra dûrî ya. Semedo ke dana berî ro aye kenê odaya sungerî. Uca de gardiyanê camêrdî danê piro."

	 

	'Waştişnameyê 'mergê xo ra ez berpirsîyar a' pê dayê îmzakerdiş'

	 

	Halîme dewam de wina vat: “Garîbe vat, psîkologa zîndanî şîya ver û tehdîd kerda. Garîbe zîndan de bi nêweşîya astimî kewte. Garîbe benê odaya sungerî. 24 saetan uca de manena. 24 saetan bi kamerayan dir yena temaşekerdiş û mecbûr manena verê kamerayan de şêro tuwalet. Wexto ke Garîbe benê odaya sungerî sereyê aye ginneo dês ro û gonî yena. Vera revîrî benê wareyê cayê pêvînayîşî. Uca de zî bi helwestê doktorî dir yena rî bi rî. Waştişnameyê, ‘mergê xo ra ez berpirsîyar a' danê îmzakerdiş."

	 

	'Dermankerdişê bi kelepçe' 

	 

	Halîme qiseykerdişê xo de wina vat: "Ma roja yewşeme bi telefon ci dir qisey kerd. Her tim erzenê serê odaya înan. Bi şewe saete 12.00 de hûmartiş yeno ferzkerdiş. Hîn gardiyanî heqeretan kenê. Garîbe tebera wanena la kitabê ci nêdanê. Tepişteyê ke benê nêweşxane zî dermankerdişê bi kelepçe ferz kenê. Semedo ke tepişteyî qebûl nêkenê peyser agêrenê."

	 

	'Muracatê sucî ame kerdiş' 

	 

	Halîme tewr peyîn wina vat: "Avûkatê ÎHDyê Stenbolî hewteyê vîyarte de şî verê Garîbe û derheqê mudurê zîndanî, doktor û gardiyanan de muracatê sucî kerdî. Bi di serrî yo kênaya xo nêvînena. Yewin waştişê mi oyo ke kênaya mi bîyarê nêzdîyê ma yan zî bidê verê embazanê ci."