'Bi destbendkerdişan wazenê vengê tepişteyan nêro eşnawitiş' 

2021-10-08 13:46:21


	 

	ÎZMÎR - Cinîyê sîyasetmedarî yê ke reaksîyon vera destbendkerdişê Îzmîr û Manîsayî dayî û wina vatî: "Amanc oyo ke vengê tepişteyê ke zîndanan de yê nêro eşnawitiş."

	 

	Vizêr saetê serê sibayî de polîsan eşt Komeleya Keyeyê Hukumwerdox û Tepişteyê Egeyî (EGE TUHAYDER), Komeleya Kesê ke Merdimê Xo Vînî Kerdê Anadoluyî (ANYAKAYDER) yê Îzmîrî, Komeleya Hetkarîya Camêrdê Dîndar (ÎDAYDER) ser. Sereştişê keyeyê Îzmîrî de pêwa Dayîka Aştîye Şukrîye Kizildag ê 70 serrî 16 kesî ameyî destbendkerdiş.

	 

	Cinîyan reaksîyon vera destbendkerdişan dayî, dîyar kerdî ke yeno waştiş, eşnawitişê binpaykerdişê heqê zîndanan bêro astengkerdiş.

	 

	'Dayîkanê ma ra tersenê?' 

	 

	Hemsereka Partîya Demokratîke ya Şaran (HDP) qezaya Turgutluyî Naîle Gumuştaş, reaksîyon ramojna û vat: "Dayîkê ma tersenê? Eke semedê îfadeyî bibayîne, do bişîne  îfade bidayîne. Vanê qey ê do bi tedayan sere bi ma bidê tewênayîş. Eke xebera ma ci ra bibayîne ma do bişîne îfadeyê xo bidayîne. Ma nêzanê dayîka ma binê çi şerdî de berdî. Semedê qerarê sînorkerdişî bibi coka ma nêdî. Ma bidîne ma do dermanê ci berdêne. Dîyar nîyo ke çend rojan do destbendkerde bimano. Manaya ci çin o ke cinîya 70 serrî bikerê zîndan. Nêweşî esta. Ganî lezabeze bêro veradayîş. Êdî bes o! Ganî sazgehê cinîyan zî hemverê nê vengê xo vejê."

	 

	'Wazenê bi destbendkerdişan cinîyan bitersênê' 

	 

	Aktivîsta Tevgerê Cinîyan ê Azadan Hayat Îzgi wina vat: "Dayîkêke 70 serrî destbend kenê û benê. Aye mîyanê sazgehê ma de ca gêna. Nê sazgehî bê înan nêbenê. Nêwazenê cinî wareyê hişmendî de aver şêrê  Çike cinîya bi fehme, komelê bi fehmî yo. Cinîya mîyanê sîyasete de zî terorîze kenê. Cinî bi serran o kuçeyan de xo ver danê. Do no xoverdayîş dewam bikero. Çi beno wa bibo, vengdayîşê semedê cinîyan oyo ke ma pîya nasnameyê xo yê cinî û têkoşînê xo ra wayîr vejîyê. Çike cinî kuçeyan de bê tewr baş o."

	 

	'Bi destbendkerdişan wazenê vengê tepişteyan nêro eşnawitiş'

	 

	Îdarekara EGE TUHAYDERî Leyla Kaygisiz zî derheqê destbendkerdişan de wina vat: "Bi hêriş wazenê ke têkilîyê keyeyan û şarî yewbînan ra qut bikerê û nê çî meşrû bikerê. Bi destbendkerdişan wazenê vengê tepişteyan nêro eşnawitiş. La ma do her wext bibê vengê tepişteyan. Ganî her kes vera tedayan vejîyo. Tena keyeyê tepişteyan ney, semedê her kesî vengdayîşê mi oyo ke hemverê şîdetî vejîyê û bibê vengê tepişteyan."