'Ma do rêxistinê xo yê zafrengî pîl bikerê' 

2021-10-06 09:45:40


	 

	 

	Medya Uren

	 

	MÊRDÎN - Barbara Akay ke semedê hemserekîya HDPyî ya qezaya Mîdyadî ameye weçînayîş da zanayîş ke HDP bi zafrengîya xo heme rêxistinê bînan rê beno nimûne û wina vat: "Ma do rêxistini xo yê zafrengî tewr xurt bikerê. Hişmendîyê nîjadperestî û cîyabîyayîşê birijnê."

	 

	Partîya Demokratîke ya Şaran (HDP) ke  wayîrê perspektîfê demokrasî û zafrengî ya her tim ferqê xo nîşan dana. Rexmê hêriş û tehdîdê tepiştişî zî hetê metodê xo de tavîz nêdana. Mîdyadê Mêrdînî de kongreyê HDPyî yê ke tewr  peyîn virazyayî de Barbara Akay hemserek ameye weçînayîş û mîyanê rêxistinî de şarê kurdî, suryanî, mehelmî ca girewtî. Hemsereka HDPyî ya Mîdyadî Barbara Akay kongre de ameye weçînayîş bale ant serê zafrengî û wina vat: "Ma bi heme rengê xo weşik ê û ma do nê rêxistinbîyayîşê xo tewr pîl bikerê."

	 

	Barbara Akay Dewa Ayn Werdoyî ya girêdayê qezaya Mîdyadê Mêrdînî ra ya. Verê ke qalê fikr û amancê ci bikerê ma wazenê dewe ci û keyeyê ci bidê naskerdiş. Ayn Werdo dewêke Suryanîyanî ya. Prosesê qirkerdişê Seyfo yê 1914-1920 de bî kelayê xoverdayîşî. Şarê suryanî yê herême hemverê qirkerdişî û îxanetî xo dêreyê Mod Har Şabo de pawitî û hemverê qirkerdişî sere wedarnayî. Şarê suryanî nê dêrî de têkoşînêk pîl dayî. Xeylêk keyeyî mecbûrê koçberî bî û çend keyeyê suryanî yê Dewa Ayn Werdoyî zî fek erdê xo ra vera nêdayî. Mîyanê şert û mercê zehmetî de xoverdayîşê xo heta roja ewro ardî. Yew nê keyeyan ra zî keyeyê Barbara Akaye ya. Barbaraya ke nê kulturê xoverdayoxî ra yena, wazena mîyanê HDPyî de zî kulturê xoverdayîşî bido dewamkerdiş.

	 

	'Ma hemverê qirkerdişî cuyêka hempar kenê amanc'

	 

	Barbara û xeylêk hemrayê ci ke her yew nîjadêk û dînêk bînî de yê eynî rêxistinî de kom bîyê. Barbara nê sey rayîr û metodo tewr weş ê îdarekerdişî erjna û vat: "Na herre xeylêk qirkerdiş û merdiş dî. Zîyanê ma bigonîya ma ameyî awdayîş. Ma heta nika nîjadperestî û pêrodayîş ra netîceyêk nêgirewt. Nika ma eşkenê yewbînan bi hêz bikerê. Ma a bawerî de yê. Zafrengîya ma zî sembolê yewbîyayîşî ya. Ma hemverê qirkerdişan cuyêka hempar kenê amanc."

	 

	'Do ciwanî bibê mîmarê cuyêka demokratîke'

	 

	Barbara dewam de wina vat: "Rêxistinêke ma yê zafrengî û weş ameyo awankerdiş. Eke ma serkewte bibê ma do bieşkê tesîr derûdorî rê zî bikerê. Ma do bibê sebeb ke rêxistin pîl bibo. Bi taybet zî lazim o ma ciwanan derûdorê xo de kom bikerê. Çîyo ke ma wazenê cuyêka demokratîke ya. Do ciwanî zî bibê mîmarê na cuye. Nê xeyalê min ê û bawer a ke ma do pîya serkewte bibê. Rojê peyînan de xeylêk hêrişî serê HDPyî de yenê kerdiş, la ma do hewil bidê ke xebatê xo tewr pîl bikerê."

	 

	'Ma do rêxistinê xo yê zafrengî pîl bikerê'

	 

	Barbara tewr peyîn wina vat: "Ez zaf kêfweş a ke layiqê wezîfeyê hemserekî ameya vînayîş. Semedê mi xeylêk girîng o. Tena têkoşînêk vera nîjadperestî nîyo, eynî wextî de zî do semedê mi bibo têkoşînêk hemverê cinsperestî. Hema herêma ma de o hişmendîyê cinsperestî nêameyo peynîkerdiş. Nika zî demê çinkerdişê heme hişmendîyê cinsperest û nîjadperestî yo. Ma do serê nê de fikrê rêxistinîyê xo pîl bikerê."