
Gulîstana ke weşîye pîyê xo ra endîşeyîn a: Ganî tepişteyê nêweşî bêrê veradayîş  

2021-10-02 11:02:53


	&nbsp;

	&nbsp;

	&nbsp;

	AMED - Reşît Tekdemîro 73 serre, 4 serrî yo Zîndanê Amedî de tepişte yo, pêwa xeylêk nêweşîyê ci estê nîno dermankerdiş. Kênaya ci Gulîstan Albayrak rewşa weşîye pîyê xo endîşeyîn a, vengdayîşê serbestveradayîşê pîyê xo û sewbîna pêro tepişteyê nêweşan kerd.

	&nbsp;

	Binpaykerdişê heqan ê zîndanan her ke şinê zêde benê û no zî tesîr serê weşîye tepişteyan de keno. Bi taybetî zî rewşa tepişteyê nêweşan tehluke de ya. Tepişteyo nêweş Reşît Tekdemîr ke 73 serre yo, serra 2018 de ame tepiştiş û nika Zîndanê Tîpa D yê Amedî de yo. Kênaya ci Gulîstan Albayrak derheqê rewşa pîyê xo de ajansê ma rê qisey kerd.

	&nbsp;

	‘Hema dermankerdişê ey nêqedîyabi ame tepiştiş'

	&nbsp;

	Gulîstane derheqê rewşa pîyê xo de wina vat: “Semedo ke nêame dermankerdiş, nêweşî zêde bî. Goşê pîyê mi nêeşnaweno. Hacet goşê ci de esto. O bînî de tup esto. Verê zî goşê xo ra û çimê xo ra amelîyat bibi. Hema dermankerdişê pîyê mi nêqedîyabi ame tepiştiş."

	&nbsp;

	Gulîstanê vat, pîyê ci semedê endemîyê rêxistine ameyo tepiştiş û vat: "Pîyê mi xeylêk tarîxê cîya cîya de ame destbendkerdiş û &nbsp;tepiştiş. Xeylêk reyan bi îşkence dir rî bi rî mend. Pêwa ke pîyê mi nêweş o bi 7 serrî û 6 mengî yo muhakeme kenê. Pêwa ke sûcî ci çin bi ame tepiştiş."

	&nbsp;

	‘Doktorî eleqedar nêbenê’

	&nbsp;

	Gulîstane dîyar kerd ke baş derman nêkenê û vat: "Pîyê mi benê nêweşxane, la dermanê ke doktorî danê, tesîr nêkenê. Doktorî eleqeyêk baş nêmojnenê ra. Seke ke ‘sûcêk pîl kerdê' nêzdî benê. No zî qîm nêkeno wextê agêrayîşî de kenê karantîna."

	&nbsp;

	‘Caardişê kêfî'

	&nbsp;

	Gulîstane dewam de wina vat: "Semedê binpaykerdişê heqan, caardişê kêfî kenê. Dermanê tepişteyê nêweşan di qat zêde danê. Pêwa tupê goşê pîyê mi qedîyayo, tupî nêdanê ci. Butçeyê ke tepişteyan rê yenê şawitiş qîm nêkenê. Werdî baş nîyê. Awe û ceyranê înan her tim yeno birnayîş.”

	&nbsp;

	‘Heqê înan yenê binpaykerdiş’

	&nbsp;

	Gulîstane tewr peyîn wina vat: "Bi di serrî yo pêvînayîşê akerdeyî yenê qedexekerdiş. Ma pîyê xo pey camî de vînenê. Bi di serrî yo ma pîyê xo ko nêkerdo. Tarîxê pêvînayîşî nînê &nbsp;dîyarkerdiş. Ma yan embazan ra yan zî zîndanî ra musenê. Dayîka mi semedê xeylêk nêweşîyan nêeşkena şêro pêvînayîş. Bi qedexekerdişê pêvînayîşan heqê ma yenê binpaykerdiş. Ma heqanê xo wazenê. Wa pêvînayîşî bêrê &nbsp;destpêkerdiş. Wa tepişteyê nêweşî bêrê veradayîş."

	&nbsp;

	&nbsp;