Çelê de demê komkerdişê încîran dest pêkerd  

2021-10-02 09:41:55


	 

	COLEMÊRG - Herêma Çelê de demê komkerdişê încîran dest pêkerd. Zimistanî serê sifreyan de rîçalê încîran û încîrê wişkî zî verê çay de cayê xo gênê.

	 

	Qezaya Çelê ya Colemêrgî de xesadê xeylêk fêkîyan dest pêkerd û nînan ra yew zî încîre yê. Bi ameyîşê zimistanî dir cinîyê herême dest bi amadekarîyê zimistanî kenê. Herême de hinar, engure, sa, miro û încîre resenê û nê mewsîmî de yenê arêdayîş. Esmer Ayar zi ajansê ma rê qalê arêdayîşê încîran kerd.

	 

	Esmer Ayar ke 2 serrî yo Çelê de ciwîyena debara xo bi pesdewarî kena. Esmere sey pêro cinîyê ke tîya cuyenê serê sibayî dest bi kar kena. Esmere pêwa zehmetîyê karî cuya dewe ra hes kena. Esmere dîyar kerd ke cuya dewe zehmet a û vat: "Ez karê dewe ra hes kena. Demo ke ez kar kena ez xo baş hîs kena."

	 

	Her mewsîm goreyê taybetmendîyê xo karêk ci esto û nika zî mewsîmê payîzî yo û demê arêdayîşê încîran o. Esmere wina bale ant serê arêdayîşê încîran û vat: "Ma ganî încîran demê înan de arê bikerê. Încîrê ke ma arêdanê ma kenê; xoşaf, bastêq û rîçal. Xeylê xo zî ma wişk kenê. Încîrî tebaxe de resenê. Peynîya menga êlule de zî ma dest bi arêdayîşî kenê. Ma tay verê tîjî de verdenê. Xeylê xo ma semedê zimistanî wişk kenê."

	 

	Esmere dîyar kerd ke çîyê ke ê hamnanî û payîz de arêdanê, zimistanî ci ra feyde gênê û vat: "Heme çî încîran ma kenê. Çîyo ke ma nika kenê, semedê zimistanî zî feydeyêk pîl dano ma. Rîçal zimistanî cayê xo serê sifreyan de gêno. Încîrê ke ameyî wişkkerdiş, ma verê çay de wenê. Nê çî sey adetêk komelê ma de dewam keno. Ma çîyê wina marketan ra nêgînê. Ma bi keda destê xo berardiş kenê."