'Hemverê polîtîkayê şerî yê vera ciwanan têkoşînêk bi rêxistinî lazim o' 

2021-09-30 13:04:42


	 

	 

	Sema Çaglak

	 

	ÊLIH - Endama Meclîsê Ciwanan ê HDPyî ya Êlîhî Tuba Çelîk dîyar kerd ke waştişê dewlete şikinayîşê dînamîzmê ciwan û cinîyê ciwanan o û vat: "Bi na kampanya ma hedef kenê ke polîtîkayê lêşinî serê ciwanan de yê teşhîr bikerê. Bi rêxistinî ma do hemverê her tewir  polîtîkayê şerî yê taybetî têkoşîn bikerê."

	 

	Meclîsê Ciwanan ê Partîya Demokratîke ya Şaran (HDP), 10ê êlule de startê kampanyaya "Ma tîryakbîyayîşî bişikinê cuya newe awan bikerê" dabî. Meclîsê Ciwanan bi na kampanya hedef keno ke bale biancê serê xebitnayîşê tîryakî û vilabîyayîşê fihûşê yê herême. Ciwanê HDPyî çarçewaya kampanyaya xo de bêmabêne xebata xo bikerê. Êlih de zî startê kampanya qezaya Hezoyî de amebî dayîş. Derheqê babete de endama Meclîsê Ciwanan ê HDPyî ya Êlîhî Tuba Çelîk ajansê ma rê qisey kerd.

	 

	'Herême de polîtîkayê taybetî yê şerî...' 

	 

	Tuba destpêkê qiseykerdişê xo de dîyar kerd ke serra 2014 ra herême de polîtîkayê pelçiqnayîşî yenê kerdiş û vat: "Bi nê planî, polîtîkayê şerî yê taybetî Kurdistan de kewtê qilê tewr corî. Her tax û kuçeyê herême de tîryak, fihûş û torê ajanî zêde bîyê û êdî bîyê normal. Ma ciwanî  hemverê nê polîtîkayan kampanyayêke da destpêkerdiş. Bi na kampanya ma hedef kenê ke nê polîtîkayê lêşinan serê ciwanan de teşhîr bikerê. Sewbîna ma wazenê ciwanan nê wareyî de bi hişmend û bi rêxistin bikerê.”

	 

	'Ma do rijnayîşê exlaqî peynî bikerê'

	 

	Tuba dewam de wina vat: "Ma startê xebata kampanyaya xo dewa Timoqî ya girêdayê qezaya Hezoyî ya Êlihî de da. Semedo ke ma xo tewr zêde biresnê ciwanan; qeza bi qeza, dewe bi dewe xebatanê xo kenê. Bi xeyrê nê xebetan ma dî ke ciwanê Êlihî çiqas wayîrê ruhêke xoverdayox û bi rêxistinî yê. Ma do  her xebatê xo de ê ruhê xoverdayox û têkoşer vejê werte. Xebatan de ma wazenê ke ciwanê ke çarçewaya polîtîk û komelî de xo bi rêxistin bikerê. Amancê ma oyo ke rijnayîşê exlaqî yê Kurdistanî peynî bikerê."

	 

	'Ma do polîtakayê înan veng vejê' 

	 

	Tuba tewr peyîn wina vat: "Dewlete zana ciwanê ke xo bi rêxistin bikerê senî têkoşîn kenê. Coka hedefê aye bingehîn zî pelçiqnayîşê têkoşînî yo. Hemverê nê ganî xo bi rêxistin bikerê û polîtîkayê hemverê bi hewldayîşê xo veng vejê. Tewr peyîn zî ez veng dana ke ma dorê na kampanya de xo bi rêxistin bikerê û têkoşîn bikerê.”