Karkerê mewsîmî: Çîyo ke yeno ferzkerdiş vera merdimayî yo 

2021-09-15 14:01:08


	 

	 

	Gulîstan Azak

	 

	DÊRSIM - Karkerê mewsîmê ke bajaran de sere de rastê hêrişê nîjadperest û xeylêk problemê bînan yenê. Karkerê ke Riha ra bi tutanê xo dir şî Dêrsim zî eynî probleman ciwîyenê. Karkera ramitişî Meryem Baruk wina vat: “Yewin waştişê ma oyo ke ma parçeyêk nan berê keyeyê xo. O zî heram kenê. Oyo ke ma rê yeno ferzkerdiş vera merdimayî yo.”

	 

	Yew wareyê ke binpaykerdişê kede yeno ciwîyayîş, ramitiş o. Bi ameyîşê wisarî dir keyeyê ke bi tutanê xo dir kewenê serê rayîran, cayê ke manenê de hêrişê nîjadperestî înan rê yeno kerdiş û xeylêk problemê bînî zî rast yenê. Karkerî sewbîna babeta awa pake de probleman ciwîyenê, çadiran de zehmetîyê pîlan ancenê. 

	Karkerê mewsîmî yê Riha ra ameyî bajarokê Perîyî ya Mezgîrtî yê Dêrsimî serê erdê verrojan de xebityenê.

	 

	‘Ma terkê mergî yenê kerdiş’

	 

	Cinîya bi nameyê Rahîme Ozturkmen (24) vat ne awa, ne ceyran, ne banyo û ne daşir esto û wina dewam kerd: “Çîyo ke ma ciwîyenê îşkence yo. Her ca de ma manenê, ma terkê mergî kenê. Yanî çîyo ke ma ciwîyenê bi yew vatişî îşkence yo. Bifikrîyê, awe, ceyran, daşir, banyo çin o. Ma awe bi satilan cayêk dûrî ra anê. Ma bi tutanê xo dir temamî 40 kesî yê. Yê ke nê zehmetî ma rê danê ciwîyayîş şerm nêkenê. La wexto ke ma vanê ma şerm kenê. Ma bi desan rey problemî vatî. La kes goş nêdano. Semedê banyo holikêke bi naylonan viraştê. Berê holikan çin o. Gama ke lamba abena, zereyê ci temamî aseno. Coka ma sereyê xo zî nêşonê. Ma nêkenê cayê însanan. Rewşêke rezîl û şerm a.”

	 

	‘Cinî her sanîye xebityenê’

	 

	Rahîme vat, emrê qijî ra karkeriya mewsîmî kena û dewam de wina vat: “Rewşa karkerê cinîyan tewr zehmet a. Cinî camêrdan zêdeyêr xebityenê. Rojaneyê înan zî camêrdan tewr kêm o. Xeylê xo karkerê mewsîmî cinî yê. Seba ke tewr zêde cinî kede danê. Ma keye de zî nan viraznenê, werd viraznenê, tutan rê ewnîyenê. Heta ereyê şanî xebityenê. Ma ancax di saetan rakewenê. Ma reyan wina aciz benê ke, ma vanê ma bimerdêne xelas bibîne.”

	 

	‘Çîyo ke yeno ferzkerdiş vera merdimayî yo’

	 

	Cinîya bi nameyê Meryem Barut (27) zî wina vat “Cayê ke sezonê karî yo bi pêroyî çend mengî dewam keno. Gama ke sezonê uca qedêno ma şinê cayêko bîn. Nîmeyê pereyê ma zî şino rayîr û lazimîyan rê. Karê ma yê Dêrsimî do çend rojî dima biqedîyo. Dima ra ma do şêrê Sêwas. Şert û mercê xebate zorê ma bena. Ma sey însanan nînê vînayîş. Lazimîyê ma bi ca nêanê. Yew kesêk nîno rewşa ma nêvîneno. Ma bi tutan dir perîşan benê. Çîyê ke ma ciwîyenê merg ra wetayêr o. Yewin derdê ma parçeyêk nan o. O zî ma rê heram kenê. Oyo ke yeno ferzkerdiş vera merdimayî yo.”