‘NY û Hukmatê Iraqî hemkarîyê hêrişan keno'

2021-09-09 12:45:34


	 

	 

	Sema Çaglak

	 

	AMED - Parlamentere Semra Guzel bale ant serê hêrişê hemverê Mexmûr û Şengalî û vat: "NY û hukmetê Iraqî bi bêvengiya xo hemkariya hêrişê dewleta tirkî kenê.” Îdarekara DBPyî ya Rezanî Hasîbe Yazdik zî hemverê hêrişan vengdayîşê yewbîyayîşê neteweyî kerd.

	 

	16ê tebaxe de Tirkîya hêrişê Suka Kanî ya Şengalî kerd û 2 kesî dinyaya xo bedilnayî û 3 kesî zî birîndar bî. Rojêke dima  hêrişê nêweşxaneyê Sikeniyê Şengalî kerd û 4 kedkarê weşîye mîyan de 8 kesî dinyaya xo bedilna, 4 kesî zî birîndar bî. Tewr peyîn zî 3yê êlule de serê sibayî hêrişê Wargehê Multecîyan ê Şehîd Rustem Cûdî (Mexmûr) kerd. Tîya zî zirarêke madî resa keye û kargehan. Hemverê hêrişê ke ameyê kerdiş de parlamentera Partîya Demokratîke ya Şaran (HDP) Semra Guzel û îdarekara Partîya Herêmê Demokratîke (DBP) ya qezaya Rêzana Amedî de Hasîbe Yazdik ajansê ma rê qisey kerd.

	 

	‘Şengal û Mexmêr hema birînê xo nêpêşnayî’

	 

	Parlamentere Semra vat, serra 1990 û 1994 de şarê Botanî seba teda û zordariyan verê xo dayî Herêma Federal a Kurdistanî û wina vat: “Wargehê Mexmûrî serra 1998ine de hetê Netewê Yewbîyaye (NY) ra ame awankerdiş. Mexmûr nika 13 hezar merdimî ciwîyenê. Uca wareyê mar û dûpişkan bi, welatijan uca kerd zergûn. Şengal û Mexmûr hema zî birînê xo yê bi serran nêpêşnayê. Herdi zî bi hewildayîşê xo wazenê bi îradeyêk azad cuya xo dewam kenê. La ewro Tirkîya ewro heqê xo demokratîk ra nêeşkena  tehamûl bikero. Pêwa nê çîyan xo rê heq vînena ke wargehêk binê sîwanê NYî de yo bombavaran bikero.”

	 

	‘NY û Hukmatê Iraqî hemkarîyê nê hêrişan o’

	 

	Semra bale ant serê NY û vat: "28ê tebaxe de Bexda de konferansê 'Bi Bexdayî dir hemkarî û şirîkî' organîze kerd. Serê nameyê Tirkîya de Wezaretê karê teberî Mewlût Çavuşoglu beşdarê konferansî bi. Dimayê nê konferansê Şengalî û dima ra zî Mexmûr hetê Tirkîya ra ameyî bombavarankerdiş. Dimayê  konferansî Meclîsê Mexmûrî yê şarî eşkerayîyêke dabi û dîyar kerdibi ke 'Teyareyê şerî endîşeyêk pîl virazneno û waştîbî ke nê teyareyê bêrê vindertiş.’ Labelê ne NY û ne zî hukmatê Iraqî derheqê babete de eşkerayîyêke da û ewro ma vînenê ke Mexmûr yeno bombavarankerdiş. Ma eşkenê vajê ke NY û Hukmatê Iraqî hemkarîyê nê hêrişan o. Ma bi hawayêke eşkera vînenê ke konferans de amanc hêriş û îşxalkerdişê herêmê ke  kurdî bi ca bîyê yo.”

	 

	‘Ganî NY wezîfeyê xo bi ca bîyaro’

	 

	Îdarekara DBPyî ya Rêzanî Hasîbe zî vat: “Bi di serrî yo hemverê Mexmûrî de hem ambargo esto û hem hêriş esto. Hêrişê hemverê Mexmûrî rewşêke şermezarkerdişî yo û qetî nîno qebûlkerdiş. Seba ke tu wijdan nê hêrişê ke hemverê kurdan yenê kerdiş qebûl nêkeno. Wargehê Mexmûrî binê pawitişê NYyî de yo la ewro NY hemverê nê hêrişan veng nêvejeno. Ganî NY wezîfeyê xo bi ca bîyaro."

	 

	‘Lazimîyê ma bi yewbîyayîş esto’

	 

	Hasîbe tewr peyîn wina vat: "Ma hêrişê dewleta tirkî şermezar kenê la eynî wextî de helwestê Herêma Federal a Kurdistanî zî  şermezar kenê. Heta nê toximê xiyanetî mîyanê kurdan nêvejîyo, yewbîyayîş zî nêvirazêno. Wa êdî Barzanî û PDK fek nê xiyanetî ra vera bidê û seba yewîye hewil bidê. Ma kurdî wazenê ke yewîya neteweyî bibo û ma zanê lazimîyê ma yê sereyîn yewîye ya. Hêrişê hemverê Mexmûr û Şengalî girêdayê tecrîdêî yo. Rojelato Mîyanên de kaosêk pîl esto. Sebebê nê kaosê zî bêguman tecrîdê serê birêz Ocalanî yo. Heta ke rayîrê diyalogî nêro akerdiş, no kaos zî nîno çareserkerdiş."