'Sebebê kaosî dewamkerdişê tecrîdî yo' 

2021-09-03 13:56:06


	 

	 

	AMED - Hemsereka DBPyî ya Rêzanê Amedî Remzîye Tek, dîyar kerd ke dinya hemverê Rayberê PKKyî Abdullah Ocalanî dirîtî kena û vat: "Ganî her kes nê helwestî bivîno û qebûl nêkero." Îdarekara MEBYA -DERî Halîme Topuz zî dîyar kerd ke bi hawayêke eşkera hemverê şarê Kurdî dişminîyêk esto û ganî şarê Kurdî hemverê nê bêveng nêmano. 

	 

	Rayberê PKKyî Abdullah Ocalan 22 serrî yo Zîndanê Tîpê F yê Asayîşê Berz ê Îmraliyî de binê tecrîdêk giran de yo. Avûkatê Abdullah Ocalanî Rezan Sarica û Newroz Ûysal, dimayê 8 serran 2-22’yê gulane, 12-18ê hezîrane û 7ê tebaxa 2019 de pêvînayîş bi muwekîlê xo dir kerdibî. 23ê Êlule 2020 de bi bahaneyê Ocalanî serra 2009 de pawitişê bi nameyê  "Xerîtaya Rayîrî" Dadgehê Heqê Merdiman ê  Ewropa (DMME) rê şawitib, 6 mengî cezaya qedexeyî avûkatanê Abdullah Ocalanî rê birnabî. Pêwa cezaya qedexeyê avûkatan 23ê Adare de peynî bî zî reyna avûkatî nêeşkenê şêrê Îmraliyî û ne negatîf û ne pozîtîf cewab înan rê nêame dayîş. Reyna bi muracatê avûkatan ê çeleyê 2021 dir vejîya werte ke cezayêke dîsîplînî yê newe dayê Abdullah Ocalanî. Nê ser o tepişteyê ke zîndanê herême û tirkîya de yê 27ê Teşrîna Peyêne 2020 kewtî grev û roja 281ine dewam keno.

	 

	Hemsereka Partîya Herêma Demokratîk (DBP) a qezaya Rêzanê Amedî Remzîye Tek û Îdarekara Komeleya Kultur, Paştdayîş û Hetkarîyê Kesê ke Dergûşê Şaristanî de MErdimê Xo Vînî Kerdê (MEBYA -DER) Halîme Topuz derheqê rewşa tepişteyan û xoverdayîşê grevê vêşanî de ajansê ma rê fikrê xo qal kerdî.

	 

	'Tecrîd nê prosesî de nîno qebûlkerdiş' 

	 

	Remzîye, dîyar kerd ke hemverê Rayberê PKKyî Abdullah Ocalanî de dirîtîyê dinya esto û vat: "Ganî heme kesî nê helwestî bivînê û qebûl nêkerê. Seba nê lazim o ke hemverê tecrîdî heme kesî wurzê serê lingan. Dewletê netewî zî hemkarê nê tecrîdê girankerde yê. Seba ke fikrê birêz Ocalanî tersenê ê tecrîdî nêwurznenê. Tecrîd serê birêz Ocalanî de serê heme şarê Rojhelatê Mîyanên û bi temamê şarê dinya keno."

	 

	'Helwestê PDKyî nîno qebûlkerdiş' 

	 

	Remzîye bale ant serê rewşa Rojhelatê Mîyanên û helwestê Partîya Demokratîke ya Kurdistanî (PDK) û wina qisey kerd: “Çi heyf, ewro PDK bi dewleta Tirkî dir mîyanê hemkarîyêk lêşin de yo. Ganî no nêro qebûlkerdiş û PDKyî nê têkiliyê bi dewleta Tirkî dir peynî bikero. Xora yeno zanayîş ke Dewleta Tirkî serekê çeteyan a. Nê prosesî de kewta tengî û siyasetêk çewt kena. Ganî şarê Kurdî bi seknêk xoverdayox û têkoşîn wurzê serê lingan û hemverê tecrîdî vejîyê."

	 

	'Ma nêzdîbîyayîşê hemverê tepişteyan qebûl nêkenê' 

	 

	Halîme zî bale ant serê rewşa tepişteyan: "Seba ke ma heme zanê zîndanan de tepişteyî xeylêk rewşêke xirab de yê. Ne werdik baş danê înan ne zî hacetê pak danê tepişteyan. Heqo bingehîn yeno binpaykerdiş. Ma seba înan pere şawenê la heta 3-4 mengan o pere nêreseno înan. Muamelêyêk keyfî zîndanan de esto. Ma telefon de înan dir qisey kenê, nêeşkenê hende qalê şert û mercê ke ci de yê qal bikerê. La wexto ke ma şinê pêvînayîşê înan, rewşa înan bi çimanê xo vînenê. Ma nê nêzdîbîyayîşê hemverê tepişteyan qebûl nêkenê. Ma veng danê dewleta Tirkî ke nê zulmî vindarnê."

	 

	'Sebebê kaosî tecrîd o'

	 

	Halîme dewam de wina vat: "Hêrişê hemverê Şengalê, kaoso ke Rojhelato Mîyanên de yeno kerdiş, tecrîdî rê girêdaye yo. Polîtîkayê şerî yê serê Rojhelatê Mîyanên, tesîrê xirab serê şarî de keno. Seba ke êdî nê şerî biqedîyê ganî rayîrê diyalogî bêro akerdiş û tecrîd bêro wedaritiş."