Şewatê Dêrsimî dewam keno: Şer cogrfayaya ma çin keno 

2021-09-01 13:19:33


	 

	 

	Gulîstan Azak

	 

	DÊRSIM - Dêrsim de seba operasyonê leşkerî adiro ke bi daristan kewt di hewteyo dewam keno û xeylêk wareyê çin bî. Cinîyê ke şî herêma şewatî wina vatî: "Welat de bi serran o şer dewam keno û cografyaya ma çin bena. Ma destûr nêdê nê çî."

	 

	Şewatê bejayîyê qezaya Hozatî yê Dêrsimî dest pêkerd û dewa girêdayê Pilûrî vila bi, dewam keno û 29ê Tebaxe de Çemê Rojî yê Gelîya Pulemûrî, roja verê zî Çemê Firtina Velî ya Gelîye Munzurî de şewat dest pêkerd.  

	 

	Goreyê zanayîşê çimeyê herême ra ameyî girewtiş, seba selahîyetdarî  mudaxale nêkenê, şewat xeylêk cayî de vila bîyo. Ame zanayîş ke adir Uzunmeşeyê Hozatî de aver şîyo û ver bi Pilûrî de şino. Dûmano ke herême de wurzeno zî merkezê bajarî de yeno vînayîş.

	 

	Çemê Rojî de mudaxaleyê şewatî nîno kerdiş

	 

	Welatijî û ekîbê îtfayeya Şaredarîya Dêrsimî mudaxaleyê şewatê daristanê Gelîye Munzurî kerdî û çar roje yo tu mudaxale şewato ke Çemê Rojî de dewam keno, nêameyo kerdiş.

	 

	Heto bîn ra zî welatîyê ke mudaxaleyê şewatê herême kerdî, dîmen antî û dîmenan de aseno ke pezkovîyê ke mîyanê şewatî de mendê remenê.

	 

	Cinîyê ke xebatê tefênayîşî rê rayberî kenê, hemverê şewatan vengdayîşê hîsgêrî kerdî.

	 

	'Daristanî hetê dewlete ra yenê veşayîş'

	 

	Yew cinîya ke seba tefênayîşê şewatî şî herême Aygul Aras bî. Aygule Almanya de ciwîyena, bi mêmanî ameya Dêrsim û tewrê xebatê tefênayîşê adirî bî. Aygule wina vat: "Kezeba ma veşena. Cografyaya ma bi serran o veşena. Ganeyî yenê qetilkerdiş. Bajarê rojawanê Tirkîya de seba daristanê ke veşenê, merdiman sûcdar kenê. Amanc werte de yo. Wazenê daristananê ma biveşnê. Bi zanebîyayîş adir erzenê daristanan.  Wazenê şarî herra înan ra dûr bifînê. Ganî ma hîsgêr bê û pîya têkoşîn bikerê. Vengdayîşê ma seba her kesî yo.”

	 

	'Mudaxaleyê şewatî nêkenê'

	 

	Leyla Polat zî wina vat: "Cografyaya ma bi serran o seba şerî yena veşayîş la bajarê rojawanî zî seba rantî veşnenê. Ma nika herêma şewatî de yê. Xêrcê ekîba zerîwaştoxî kes çin o mudaxale bikero. Nêverdenê şar zî mudaxale bikero. Cayê ke şewat esto, dewî uca de yê. Merdimî pesdewarî kenê. Heywanî mîyanê şewatî de manenê. Ma nêwazenê cografyaya ma bibo çol. Ganî her kes wurzo serê lingan û vengê xo berz bikero. Ez zî herême ra nêvisêna. Heta peynî tîya ya."

	 

	'Pîrozîyê ma yenê veşayîş' 

	 

	Gulseren Tutmez zî reaksîyonê xo wina ramojna: "No wehşet, zulm û dej o. Nê ganeyê ke veşenê, ez zerrîya xo da hîs kena. Qêrînayîşê înan xo vera dano zerrîya mi. Bi serran o cografyaya ma seba şerî yena veşayîş. Ameyoxê ma yeno sîyakerdiş. Xozaya ma pîroz a. Pîrozîyê ma yenê veşayîş. Ganî ma hîsgêrîyê xo zêde bikerê. Heta adir nêtefîyo ez o têkoşîn dewam bikerî."