Dayîkê Botanî: Gama ke daristanî veşenê kezeba ma zî veşena 

2021-08-21 12:44:42


	 

	Rojda Aydin 

	 

	ŞIRNEX – Dayîkê Botanî, reaksîyon vera şewatê daristanan dayî û vatî: "Bi zanebîyayîş daristananê Kurdistanî yenê veşayîş. Gama ke daristanî veşenê, kezeba ma zî veşena. Ganî kurdî hemverê şewatan bêveng nêbê û wayîrê xoza û daristananê xo vejîyê."

	 

	Hêrişê hukmatê AKPyî herêma Botanî de dewam kenê. Yew zî parçeyê şerê taybetî yê talankerdişê ekolojî yo. Botan de Koyê Cûdî, Gabar û Bestayî hetê leşkeran ra netîceyê operasyonan de yenê veşayîş. Şewatî bi taybetî nînê mudaxalekerdiş. Dayîkê Botanî reaksîyon vera şewatê daristanan dayî û vatî, bi zanayîş daristanî veşnayîş.

	 

	'Daristanê ma bi zanebîyayîş yenê veşayîş' 

	 

	Mûzeyyen Înan, dîyar kerd ke Kurdistan de ko û daristanî bi zanebîyayîş yenê veşayîş û vat: "Botan de daristanê ma bi zanebîyayîş yenê veşayîş û darê ma bi destên qorîcîyan yenê birnayîş. Kesê ke daristananê ma veşnenê û daranê ma birnenê wazenê ma bê daristanan verdê. Heta kerrayê daristanê ma ameyî veşayîş. Gama ke hetê rojawanê Tirkîya de şewat vejêno, hukmat keweno mîyanê tevgerî. Labelê gama ke daristanê ma yenê veşayîş tu çîyêk nêkenê û bêveng manenê. Şerê ke taybet herême de yeno kerdiş. Gama ke ma wazenê adir bitefnê, ma yenê astengkerdiş. No zî mojneno ke wazenê daristananê ma çin bikerê. Hukmat şewatê Botanî rê peygoşî keno. Dayîkê ma bi destê xo xoza zergûn kerdî û xemilnayî. La hukmat nika daristananê ma veşneno û wazeno cuye ma rê bikero cehenem."

	 

	'Çira hemverê şewetan de bêveng ê?' 

	 

	Mûzeyyene dewam de wina vat: "Gama ke însanî yenê qetilkerdiş tu kes veng nêvejeno. Nika zî daristanê ma yenê veşayîş, reyna kes veng nêkeno. Hukmat her het ra hêrişê ma kurdan keno û seba ke ma çin bikero. Bi şewat wazenê ke peynîya ma kurdan bîyarê. Labelê wa ê zî baş bizanê ke ê biveşnê zî ma do bi destê xo reyna zergûn bikerê. Cayê ke daristanî çinbê cuye zî ûca de çin a. Gama ke daristanî veşenê, kezeba ma zî înan dir veşena."

	 

	'Çira daristanê Kurdistanî veşnenê' 

	 

	Leyla Aslan zî wina vat: "Bi bahaneyê 'cayê asayîşî' darîstanî ma rê yenê qedexekerdiş. No zî qîm nêkeno daranê ma birnenê. Wazenê wareyê cuye ma rê teng bikerê. Darê ma yê fêkîyan nêverdayî. Êdî sey verê ma nêeşkenê berardişê xo bigîrê. Metrepolan de daristanî veşenê ca de mudaxele kenê la tîya nêkenê. Gama ke welatijî şinê bitefnê zî yenê astengkerdiş. Çira no cîyabîyayîş yeno kerdiş."

	 

	'Ma do wayîrê daristananê xo vejîyê'

	 

	Leyla tewr peyîn wina vat: "Ma do , destûr nêdê ke kultur û tarîxê ma çin bikerê. Ma do reyna xozaya xo zergûn bikerê. Nê darê ke yenê veşayîş dayîk û pîrêkê ma bi dstê xo dayê ro. Ganî vera şewetan de ma bêveng nêmanê. Ma wayîrê daristananê xo vejîyê."