Aktîvîsta TJAyî Turkan: Hemverê şîdetî de pawitişê bi rêxistinî lazim o 

2021-08-20 13:14:08


	 

	 

	
		STENBOL - Aktîvîsta TJAyî Turkan Kocadag, bale ant serê kiştoxê cinîyan û vat: "Dosyayê kiştoxan de xeylêk sûcê ke ameyê kerdiş estê û no çî tesadûfi nîyo. Rêxistinbîyayîşêk xirab esto la cinî zî do hemverê nê xirabîyan de, do bi rêxistinî xo bipawê." 
	
		 


	Tirkîya de kiştişê cinîyan demê peyînan de xeylêk zêde bîyo. Pêwa reaksîyon û çalakîyê rayaumumî hemverê kiştişê cinîyan de reyna zî kiştoxî serbest yenê veradayîş. Dosyayê kiştox û hêrişkaran de xeylêk eynî sûcî estê la reyna zî serbest yenê veradayîş. Aktîvîsta Tevgerê Cinîyan ê Azadan (TJA) Turkan Kocadag, ajansê ma rê qalê rewşa nika kerd.

	 

	'Wazenê cinîyan kuçeyan ra dûr bifînê' 

	 

	Turkane destpêkê qiseykerdişê xo de bale ant serê zêdebîyayîşê sewîyeya şîdetî û vat: "Bi kiştiş cinî yenê tersnayîş û wazenê cinîyan kuçeyan ra dûr bifînê. Serekkomar Recep Tayyîp Erdogan bi vatişê xo paştdayîş dano kiştoxan. Eşkerayîyê ke serra 2013 ra heta nika yenê dayîş de kiştişê cinîyan se ra se zêde bî. Mîyanê 8 mengê emsarî de seba vatişê cinsperestî 100 ra zêdeyêr cinîyî ameyî kiştiş. No çî seba vatiş û helwestê îqtîdarî bi ca yenê."

	 

	'Komel êdî rijêno...'

	 

	Turkane, dîyar kerd ke kiştoxî vatişê îqtîdarî ra hêz gênê û va, "Qanûnê ke bîyaye yo kiştox û hêrişkaran paweno û cesaret dano înan. No çî nîşaneyê rijnayîşê komelî yo û na rewşe merdiman zaf xemgîn kena. Bi her hawayî mîyanê komelî de rijnayîş û dejenerebîyayîş aver şîyo.  Cîyakerdişê hemverê cinîyan û îhlalkerdişê heqê cuye ya cinîyan bi qanûnan reyde girêdayeyo. Cayê ke edalet û huqûq çinbo, ûca de feqîrî, veşanî, dizdî, hêrişê nîjadî, rant, şîdet û kiştiş esto."

	 

	'Bawerîya ma zîhnîyetê bîyaye rê çin a'

	 

	Turkane dewam de wina vat: "Ganî , zîndanan de kiştoxî nêbê makîneyêke ceza. Bi perwerdeyan bêrê vurnayîş. Sewbîna hemverê kiştişan û şîdetî zî ganî cinî xopawitişê xo aver berê. Zîhnîyeto ke vano bawerîya ma Talîban ra esto, cîya nîyo û ganî bawerîya ma nê zîhniyetî rê nêro. Cinîyê kurdî bi sloganê 'heq nîno dayîş, yeno girewtiş' do têkoşînê xo dewam bikerê. Cinî do bi paştdayîşê hemverê zîhniyetê bîyaye de têkoşînê xo pîl bikerê."

	 

	Turkane, bi sloganê, "Cinî ciwîyayîş azadî" qiseykerdişê xo wina qedêna: "Kuçe, taxe û wareyê cuye de cinî do rêxistinbîyayîşê xo aver bero. Rêxistinbîyayîşêk xirab esto la cinî zî do hemverê xirabiyan de bi rêxistinî xo bipawê."