HDPyijî Elkê de bi sloganê 'Biciwîyo xoverdayîşê zîndanan' ameyî pêşwazîkerdiş 

2021-08-19 14:55:38


	 

	 

	ŞIRNEX - Rêxistinê HDPyî yê Şirnexî, çarçewaya kampanyaya “Demê Azadîye” de Elkê de serdayîşê esnafan kerd û kombîyayîşê şarî organîze kerd. Bername de vengdayîşê tewrbîyayîşê pêvînayîşê ke Şirnexî de bêro kerdiş, ame kerdiş.  

	 

	Rêxistinê Partîya Demokratîke ya Şaran (HDP) ya Şirnexî, çarçewaya kampanyaya “Demê Azadîye” de qezaya Elkê ya Şirnexî serdayîşê esnafan kerd û dima ra zî kombîyayîşê şarî kerdî. Hetkarê Hemserekê Pêroyî yê HDPyî Tayîp Temel, parlamentere Fatma Kurtalan, Nuran Îmîr û Hûseyîn Kaçmaz, aktîvîstê Tevgerê Cinîyan ê Azadan (TJA), endam û îdarekarê merkez û qezayê tewrê bernameyî bî. 

	 

	Girseyê HDPyî dewa Melêsî ya Elkê hetê şarî ra bi def û zurna ameyî pêşwazîkerdiş. Dimayê pêşwazî girse, ver bi qeza ra kewtê rayîr û tîya zî bi eleqeyêk pîl ameyî pêşwazîkerdiş. 

	 

	Sewbîna girse bi def û zurna, bi sloganê, “HDP şar o, şar tîya de yo” û “Biciwîyo xoverdayîşê zindanan” serdayîşê esnafan kerdî. Serdayîşê esnafan de vengdayîşê tewrbîyayîşê 21ê tebaxe de Şirnexî de bêro kerdiş, kerdî. Girse dimayê serdayîşî, derbazê Parqê Şaredarî bi û ûca de kombîyayîşê şarî ame kerdiş. Kombîyayîş de Tayîp Temel qisey kerd. 

	 

	Tayîpî wina vat: "Xeylêk bajarê Tirkîya û Kurdistanî de hêriş û qirkerdiş yenê kerdiş. Hemverê partîya ma hêriş yenê kerdiş û wazenê padê. Labelê şarê ma  wayîrê partîya xo vejêno. Ma reyke bîn dî ke şarê ma wayîrê partîya ma vejêno. Hemverê hêrîş û qirkerdişan zî fek wayîrvejîyayîşî ra vera nêdê. Şarê Botanî tim serê linganê xo de mendo û hemverê hêrişan xo ver dano. Ma do qetî serbikewê. No do bireso amancê xo."

	 

	Dimayê qiseykerdişan, bernameyê Elkê peynî bi.