'Îqtîdar û hetgirê îqtîdarî nîjadperestî sûr kenê' 

2021-07-28 13:58:43


	 

	ENQERE - Welatijê ke derheqê  zêdebîyayîşê hêrişê nîjadperestî yê Anatolyaya Mîyanên ewnîyayîşê xo ardî ziwan, dîyar kerdî ke vatişê îqtidar û hetgirê îqtîdarî nîjadperestî sûr kenê û wina vat: "Semedê nîjadperestî bi peynî bibo, ganî prosesêk newe yê çareserî dest pêkerd."

	 

	Ma derheqê hêrişê nîjadperestî yê serê kurdan de mîkrofanê xo welatîyê Enqereyî rê derg kerd. Xeylêk welatijan dîyar kerdî ke sedemê hêrişê nîjadperestî helwest û vatişê îqtidar û hetgirê ci yê.

	 

	'Sîyasetmedarî hêrişê nîjadperestî sûr kenê'

	 

	Selma Altun dîyar kerd ke rewşa Tirkîya ver bi başbîyayîş nêşina û wina vat: "Kurdî ewro her ca de estê. Kurdî, tirkî, lazî her cayî de estê. Merdimî û heywanî yenê kiştiş. Ma bî şarêk ke şer û pêrodayîş rê amade bê. Sîyasetmedarî hêrişê nîjadperestî sûr kenê û şar zî pey nê şino. Kurd û tirkî mîyanê yewbînan de ciwîyenê. La kesê ke têmîyanî viraznenê, zaf ê. Merdimî her ca de merdim ê."

	 

	'Nîjadperestî cahiltî ya'

	 

	Ayşenur Kilinçarslan vat, nîjadperestî cahiltî ya û wina dewam kerd: "Kurdî wayîrê kulturêk cîya yê. Merdimê cahil û xo ra razî, xo merdimê bînan ra pîl vînenê. Semedê egoyê xo zî tatmîn bikerê nîjadperestî kenê. Ganî heme polîtîka bêro vurnayene. Ez wazena welatêk ke edalet ci de bibo biciwîyî."

	 

	'Ez tirk a labelê hetê kurdan de ca gêna'

	 

	Gulsum Ablak zî aye cîyayî nêkena mabêne merdiman û vat: Kurd, Alman, Rûs, Tirk heme sey yewbînan ê. Ez tirk a lêbelê ez hetê kurdan de ca gêna. Ma Sûrîyeyijan welat de bi ca kerd labelê ma heqê daleqnayîşê tabelayêk nêdanê kurdan. Çira qiseykerdişê bi kurdî serbest nîyo? Kurd û tirkan pîya semedê nê welatî şer kerd labellê heq nêêdanê kurdan, danê êyê ke teber ra yenê. Vernê de gerek no fehm bêro vurnayîş. Ez rastgir bîya la ez vuryaya. Ez wazena welatêk azad de biciwîyî. Kurdî zî nê çî wazenê. Ez sey tirkêk kurdan heqdar vînena. Heqê kurdan yeno sînorkerdene."

	 

	'Ganî her kes hetkarîyê yewbînan bikero'

	 

	Gulhanim Karababa zî wina vat: "Ez tu wext cîyayî nêkena. Yo girîng oyo ke sere de têduştî bigîrê verê çiman û a gore vurnayîş bikerê. Ganî her kes hetkarîyê yewbînan bikero ke vurnayîşêk bi ca bêro."

	 

	'Hêrişê nîjadperestî semedê cîyabîyayîş yenê meydan'

	 

	Ezgi Çetinkaya zî wina qal kerd: "Merdimî bi bahaneyê ke kesê ke înan ra nêbê cîya bivînê. Bi taybetî xeylêk kesî wazenê beşêk însanî teberê cuye de verdê, beşêko cîyabîyayîş nêkeno zî tesîrê nê de maneno û cîyabîyayîş keno. Coka zî hêrişê nîjadperestî kenê. Hêrişê nîjadperestî semedê cîyabîyayîş yenê meydan."

	 

	'Eşkenê newe ra prosesê çareserî dest pêbikerê'

	 

	Rahşan Sezgin vat sebebê nîjadperestî sûcê selahîyetdaran o û vat: "Ez yo ke sere de yo hes nêkena la partîyê bînî zî wina kenê. Eşkayîne prosesê çareserî baş biameyîne kerdiş. Eşkayîne merdimî bêrê têhet. La nê zî sey hacetê sîyasetî xebitnayî. Ganî yê ke sere de yê vernê de şarî bifikrîyê. Eşkenê newe ra prosesê çareserî bidê destpêkerdiş. Ganî sîstem bêro vurnayîş. Ganî cuyêka azad ê hemine bibo."