HDPyî hemverê nîjadperestî vengdayîşê têkoşînî kerd 

2021-07-26 15:26:05


	 

	 

	COLEMÊRG - Rêxistinê HDPyî yê Colemêrgî hemverê şîdet û nîjadperestiyê ke welat de zêde benê, vengdayîşê têkoşînê hempar kerd û vat: “Ma do bi qerarbîyayîşê xo cuyêka bi pîya dewam bikerê.”

	 

	Rêxistinê Partîya Demokratîke ya Şaran (HDP) ya Colemêrgî, bi eşkerayîyêk reaksîyonê bi şîdet û hêrişê nîjadperestî yê hemverê Kurdanê Afyon, Enqere û Konyayî, da. Eşkerayî verê bînaya partî de ame dayene. Parlamenterê HDPyî yê Colemêrgî Saît Dede, Meclîsê Dayîkê Aştiye, hemserekê qeza û xeylêk endamê partî beşdarê kombîyayîşî bî.

	 

	Hemsereka Qezaya Merkezî Sînem Seven, eşkerayî de qisey kerd û wina vat: “Yê ke wareyê sîyasî û huqûqî de bi ma nêeşkenê, muracatê hêrişê nîjadperestî kenê. Huqûqê unîversal de hêrişê nîjadperestî sûcê hemverê merdimayî yê. Bi nê hêrişan wazenê Tirkîya ver bi teraşî berê.”

	 

	Sîneme hemverê hêrişan vengdayîşê têkoşînê demokratîkî kerd û vat: “Ma tena eşkenê bi têkoşînêk hempar hêrişê wina yê nîjadperest yê hemverê Kurd û partîya xo bidê vindarnayîş. Semedê cuyêka bi hizûr ma vengdayîşê paştdayîşî her kesî rê kenê. Bêrê ma hemverê  nijadperestî cuye pîya bimunê.”