Kesê ke keda înan nîna vînayîş: Kedkarê mewsîmî 

2021-07-25 12:51:03


	 

	 

	Gulîstan Azak

	 

	EDENE - Kedkarê mewsîmî ke her şaristanî rê şinê, sere de hêrişê nîjadperestî, bi her hawa nêheqî înan rê yeno kerdiş û keda înan yena werdiş sewbîna xebatêke şert û mercê ci zor û zehmetî yê înan rê yeno ferzkerdiş. Kedkara mewsîmî Elîf Bîngîn ke çadirê kedkaran ê biçûl ke Edene de manena, dîyar kerd ke Tirkîya de zehmetîyê tewr pîl kedkarê ramitişî yê mewsîmî vînenê.

	 

	Tirkîya de pêwa krîzê ekonomî, feqîrîya cinîyan zêde bena. Nê problemî tewr pîl zî kedkarê ramitişî vînenê. Semedê xebate her serre kedkarê mewsîmî verê xo danê şaristanê cîya cîyan. Nê kedkarî zî sere de bi nijadperestî û xeylêk probleman dir rî bi rî manenê û şert û mercên xirab de xebate înan rê yena ferzkerdiş.

	 

	Kedkarê mewsîmî ke Şirnex ra ameyê Edene, semedo ke bixebityê zî eynî probleman ciwîyenê.

	 

	'Kedkarê ramitişî zehmetîyan ancenê'

	 

	Bi seyan kedkarê ke kewtê rayîr, yew ci ra zî Elîf Bîngîn (26) problemêk ciwîyaya qal kerd. Elîfe dîyar kerd ke aye 10 serrîya xo de dest bi xebate kerda û vat: "Tirkîya de tewr zêde karkerê mewsîmî zahmetîyan ancenê. Ma serê sibayî rew wurzenê, heta şan de xebityenê. Ma binê germê zêde de xebityenê. Ma hamnanî semedê germ û zimistanî zî semedê serdî mîyanê zîyanî de xeylêk zehmetî ancenê. Çadirê ma zî çadirê tewr xirab ê. Ma waştêne ke kedkarê mewsîmîyan rê zî keyeyî bêrê viraştiş. Ma cilanê xo bi destê xo şunê."

	 

	'Ma heqê keda xo zî nêgînê' 

	 

	Elîfe dîyar kerd ke ê heqê keda xo nêgînê û vat: "Pîyê mi çend serrî verê rehmet kerd. Ez dayîke û birayê xo dir manena. Nika tena ez xebityena. Cayê ma de îmkanê karî çin o. Eke şaristanê ma de îmkanê xebate bibayîne, ma nêameyîne tîya. Ma semedê problemê debare yenê tîya. Bi heqdestêk kêm ma hewl danê faturayê ke her roje zam kenê, bidê. Rojane ma 80 TL gênê. Tenekeyê rûnî ser ra kêm çin o. Ma semedê vayî nêeşkenê debara xo biikerê. Ma serê sibayî ra heta şan de xebityenê, bi pereyê ke ma gênê ma eşkenê çend zeytûnan bigîrê. Ma nêeşkenê lazimîyê xo bi ca bîyarê."

	 

	'Barê cinîyan tewr giran o'

	 

	Elîfe tewr peyîn dîyar kerd ke barê cinîyan tewr giran o û vat: "Ti şina keye de zî xebityena. Zehmetîyo tewr pîl cinîyî nê wareyî de ciwîyenê. Heme bar serê paşta cinîyan de yo. Çi heyf komelî no bar dayo serê milê cinîyan."