Nobeta 'edaletî' ya Emîne û Ferît Şenyaşar roja 137ine de ya 

2021-07-23 14:36:37


	 

	 

	RIHA - Emîne û Ferît Şenyaşar, roja peyîn ya roşanî de, çalakîya xo ya nobeta “edaletî” verê awanîya Edlîyeyê Rihayî dewam kerdî û vat: "Binê zulmî de roşan nêbeno. Zanabîyayîşê qirkerdişî tena qîm nêkeno, yo lazim o bikero."

	 

	Emîne Şenyaşar hêrişê pawitox û merdimê Parlamenterê AKPyî yê Rihayî Îbrahîm Halîl Yildiz de, mêrde û di lajê ci ameyî qetilkerdene, bi lajê xo Ferît Şenyaşarî dir 137 rojan verê Edlîyeyê Rihayî de dest bi çalakîya nobeta "edaletî” kerdî. Keyeyê ewro  roja peynî ya Roşanê Qurbanî de, çalakîya xo ya verê awanîya Edliyeyê Rihayî de dewam kerd.

	 

	Ferîd Şenyaşar, dîyar kerd ke semedê çîyê ke ciwîyayê nêeşkenê roşan pîroz bikerê wina vat: "Serê ma de zulmêko pîl esto. Birayêkê mi 3 serrî yo odayêka yew kesî de yeno tepiştene. Heto bîn ra  3 merdimê ma nêweşxane de ameyî qetilkerdene. Derheqê nê de tu tehqîqat nêame destpêkerdene. Kesê ke nê zulmî kerdî, verê çimanê ma de gêrenê. Coka ma vanê binê zulmî de roşan nêbeno. Ma do dimayê roşanî zî nobeta xo dewam bikerê. Walîyê Rihayî ra bigîrê, heta  Serekkomar, parlamenter û her kes zano ke nêweşxane de qirkerdiş virazya. La êdî zanabîyayîş qîm nêkeno, ganî çîyo lazim bikerê. Heta ke edalet nêro ma tîya ra nêşinê."

	 

	Keyeyî serê hesabê xo yê medyaya dîjîtalî de zî wina vat: "Eke serê  na tabela de edalet bibayîne, 137 rojî yo çi karê ma tîya bibayîne! O wext eke edalet çin o, no vatiş tîya se keno? Yan ma do edalet bîyarê, yan zî ma do nê vatişî tîya ra wedarnê. (Nêweşxane de verê çimanê mi de mêrdeyê mi ame qetilkerdene. 3 serrî yo tu kes nêameyo tepiştene.)"