'Pêro polîtîkayê şerî girêdayê sîstemê tecrîdî yê' 

2021-07-23 12:35:06


	 

	 

	Sema Çaglak

	 

	AMED - Aktîvîsta TJAyî Zulfîye Kîşmîr dîyar kerd ke pêro polîtîkayê şerî girêdayê polîtîkayê tecrîdî yê û wina vat: "Ewro qirkerdişê cinî, kulturî û sîyasî yeno kerdene. No pêro girêdayeyê sîstemê tecrîdî yo. Coka semedê çareserkerdişê probleman, şiknayîşê tecrîdî ganî semedê pêro kesan wezîfeyê yewin bo."

	 

	Rayberê PKKyî Abdullah Ocalan 15ê Sibata 1999 ra heta nika Îmraliyî de yeno tepiştene û 20ê Temmuze 2011 ra heta nika binê şertê giran yê tecrîdî de yeno verdene û bi keye û avûkatanê xo dir nêeşkeno pêvînayîş bikero. Sewbîna tepişteyê sîyasî yê dewaya PKK û PAJKî zî 27ê teşrîna peyêne 2020î de, bi amancê wedaritişê tecrîdê serê Rayberê PKKyî Abdullah Ocalan ke 22 serrî yo Zîndanê Îmraliyî Tîpê F yê Asayîşê Berzî de tepişte yo û semedê peynîkerdişê binpaykeridşê heqê merdiman yê zîndanan, dest bi çalakîya grevê vêşanîye yê bêdem û bidor kerdibî. Çalakîya ke 5 rojan reyke bidor ameyîne kerdene, bi minasebetê 39in serrgera çalakîya rojeyê mergî yê pîlî ke 14ê Temmuze 1982 de hemverê wehşetê Zindanê Amedî amebi destpêkerdene, êdî kom bi kom 15 rojan reyke bidor bêro kerdene.

	 

	'Pêro polîtîkayê şerî girêdayeyê polîtîkayê tecrîdî yê' 

	 

	Aktîvîsta Tevgerê Cinîyan ê Azadan (TJA) Zulfîye Kîşmîr, dîyar kerd ke tecrîdê serê Rayberê PKKyî Abdullah Ocalanî, serê cinî û seranserê cuye de yeno kerdene. Zulfîye wina vat: "Tecrîd, semedo ke cinî azadîya xo bi dest nêkero, şar pawitişê heqê xo nêkero, bi her hawayî yeno kerdene. Eke ma tecrîdê serê Birêz Ocalanî bigîrê dest, dengeyê sîyasetê mîyanneteweyî û sîyasetê zereyî  yewbînan ra visnaye nîyê. Îqtîdarê  serdest ê camêrdan ke seranserê dinya de dewam keno, bi rayberîya kurd û cinîyan de hemverê ci yeno vejîyayîş."

	 

	'Cinî hemverê şiknayîşê tecrîdî meydanan de yê'

	 

	Zulfîye dewam de wina vat: "Cinî hemverê tecrîdî meydanan de yê û têkoşînêk pîl kenê. La hetê dewlete ra zî o têkoşînê înan bi teda hewl danê ke bipelçiqnê. Tecrîd tewr zêde serê cinîyan de yeno kerdene, coka tewr zêde cinî hemverê nê de têkoşîn kenê. Vernîya têkoşînê azadîya kurdan de, cinî binê tecrîdêk hezar serran de bî. Qalê bîyayîşê cinîyan nêameyîne kerdiş. Pêwa têkoşînê azadîya kurdan, cinî hay ci ra bî û têkoşînê xo pîl kerdî. No zî bi xêrê paradîgmayê Birêz Ocalan ê serê cinîyan de bi. Bi vatişê, "Heta ke cinî azad nêbo komel azad nêbeno" azadîya cinîyan bî madeyê bingeyîn. Cinî zî hêzê xo ra bî haydar. Labelê ewro yeno waştene cinîya ke bî wayîrê îrade û hêz, vengê ci bêro birnayene. Serê cinîyanê ke vengê azadî vejenê, tecrîdêk giran yeno kerdene û înan kenê zîndanan. Semedo ke ê zî zanê eke cinî jîyat û zana bibo îqtîdarê înan vîndî keno."

	 

	'Têkoşînêk pîl lazim o' 

	 

	Zulfîye tewr peyîn wina vat: "Bi hawayêk giran tecrîd zîndanan de yeno kerdene. Sey ke yeno zanayene zîndanan de kitab nêdanê, şawitişê mektuban yeno astengkerdiş. Pêvînayîşê tepişteyan yeno astengkerdiş û xeylêk binpaykerdişê heqan yenê kerdiş. Nê çîyê ke mi vatî, sewîyeya tecrîdo ke ameyo roja ewro nîşan dano. Hemverê şikinayîşê tecrîdê şarê  kurdî helwestêk xurt nîşan dano. Hem herême de hem zî teberê welat de. Helbet nê gamê girîng ê la ganî semedê çareserîyê problemê kurd û şikinayîşê tecrîdî azadîya birêz Ocalanî bi ca bêro. Coka têkoşînêk pîl lazim o."