Avûkate Îlke Işik: Ma do bi rayîrê huqûqî têkoşînê xo dewam bikerê 

2021-07-14 14:38:27


	 

	ENQERE - Avûkate Îlke Işik dîyar kerd ke cinîyê ke derheqê Pêkerdişê Stenbolî de muracatê Dadgeha Berzî kerdibî, cewabê ci 1ê Temmuze de ameyo dayene û vat, no tesadufî nêyo û derheqê qanûnê hûmara 6284 zî vat, “No welat de ‘sendîyê ke vanê dorê qanûnê 6284 yo’ estê."

	 

	Pêkerdişê Stenbolî ke bi qerarnameyê serekkomarî 20ê Adare de ame feshkerdene 1ê Temmuze de ame wedaritene. Pêwa parlamenterê cinî yê partîyê muxalîf, bi seyan avûkatî muracatê Dadgeha Berzî kerdibî û waştibî ke  qerarê pêkerdişî bêro vindarnayene.  Dadgeha Berzî 1ê Temmuze de semedê waştişê hîrê kesan cewab da û hîrê zî red kerd. Xoverdayîşê cinîyan pêwa her çî dewam keno.

	 

	Avûkata Koma Avûkatê Hemdem û Azadîwaştoxan û endamê Serekîya Baroyê Enqereyî avûkate Îlke Işik derheqê pêkerdişî de ercnayîş kerd.

	 

	'Çira pêkerdiş ra xo antî?'

	 

	Îlkeye dîyar kerd ke serrê vîyarte de vatişê wedaritişê pêkerdişî ameyê rojeve la semedê reaksîyonê cinyan îqtîdar peyser game eşto. Îlke, planê çalakîya serekkomar Recep Tayyîp Erdoganî ya 1ê Temmuze de eşkera kerd û ard vîr û vat: "No welatî de şîdetê serê cinyan problem o. Problemê bêtêduştî estê. Dewaya Elmali hişê ma hemine de ya û no zî ramojneno ke tutî probleman ciwîyenê. Ma fam nêkenê ke çira no pêkerdişo ke têduştîyê cinî, tut û LGBTijan wazenê, ancenê."

	 

	'AKPyî polîtîkayê bêtêduştî tewr giran kerd'

	 

	Îlke bale ant serê şîdetî û vat: "AKP bi israr polîtîkayê dişminîyê cinî, polîtîkayê ke bêtêduştî bi eşkera tesdîq keno, dewam kerd. Yanî bi serran o bi vatişê, ‘têduştîyê cinî û camêrdan hemverê fitratî yo' şîdet zêde kerd. Îqtîdaro ke cuy xo serê bêtêduştî de awankerdo esto. Îqtîdaro ke bi înad cinî bi keye dir dano naskerdene esto."

	 

	'Qerar manayîn o' 

	 

	Îlke dewam de wina vat: "Qerarê Dadgeha Berzî ke 1ê Temmuze de da zî tesaduf nêyo. Ma roja peynî kewenê kuçeyan la Dadgeha Berzî rojêk verê qerarêk wina dana. No semedê cinîyan rastî zî rewşêka bi xof o. Dadgerê ke nê qerarî red kenê, çîyê ke ma vanê tesdîq kenê û bi hîrayî vanê, 'çîyêk wina nêbeno, bi qerarnameyê serekkomarî bi qerarê yew kesî nêeşkenê pêkerdişê mîyanneteweyî bêro antene.' La çi heyf Dadgeha Berzî yew vengî qerar dana. No babetêke demokrasî ya. Camêrdêk nişneno ro û derheqê cuya merdiman de qerar dano. Hemverê ma de bêhuqûqîyêk pîl esto."

	 

	'Ma fek pêkerdiş ra vera nêdayo' 

	 

	Îlke tewr peyîn wina vat: "Qanûnê 6284 netîceyê têkoşînêk pîlî de ame bidestkerdene. Qezencê ke Qanûnê Medenî û Qanûnê Cezayî de zî wina yê. Coka ma fek Pêkerdişê Stenbolî ra vera nêdayo. Ma do têkoşînê xo yê huqûqî dewam bikerê. Ma do fek têkoşînê xo ra vera nêdê."