'Dimayê 28 serrî agêraya dewa xo' 

2021-07-10 14:43:40


	 

	Medya Uren

	 

	MÊRDÎN - Emîne Kavcu ke dewa Qurdîsî ya girêdayê Mêrdînî ya netîceyê hêrişê dewleta tirkî yê 1993 de koçê Stenbolî bî. Dimayê 28 serran agêra dewa xo û veng da heme kurdan ke agêrê dewa xo.  

	 

	Dewleta tirkî serra 1994 de bi qasê 3 hezar dewî veng kerd û bi milyonan welatijî mecbûrê koçberî ameyî kerdene. Tewr zêde nê welatijî metropolê Tirkîya de yan zî welatê cîya de bi ca bî. Bi serran o koçberî vera tehdîdê polîtîkayê înan yê taybetî, têkoşîn kenê. Coka mîyanê metropolan de tewr zêde rastê qirkerdişê kultur û ziwanî ameyî. Nê dewan ra yew zî dewa Qurdîsî ya girêdayê Mêrdînî ya. Keyeyê Emîne Kavcu zî serra 1993 de koçê Stenbolî bena. dimayê 28 serran zî agêra dewa xo û serê erdê xo de cayê xo awan kerdî.

	 

	Mecbûrê koçberî bena 

	 

	Emîne Kavcu serra 1961 de dewa Qurdîsî ya Mêrdînî de yena dinya û 17 serrîya xo de yena zewicnayene. Emîne bena dayîka 5 tutan û emrê xo yê 32 serrî de serra 1993 de mecbûrê koçberî bena û Stenbol de bi ca bena. Vernîya koçberî de zî kênayêke aye vînî bena û hema zî xebere ci ra nîna girewtene. Koçberî û mîyanê cuyêka feqîrî de ciwîyena û keyeyê xo dir têkoşîn kena.

	 

	'28 serrî yo nêmusa metropolan'

	 

	Emîne dîyar kerd ke ê mecbûr ameyîne verdayene ke koçber bibê û vat: "Vêşanî zaf zehmet a û ma bi nê dir rî bi rî verdayî. Ma mecbûr verdayîne ke ma koçber bibê. Verê nê de dewijan serê erdê xo de têkoşîn kerdê û dewa xo vera nêdayî. Labelê tewr peyîn dewê ma ameyî veşnayene û bi merg ma tehdîd kerdêne. Ma remayî, ma çîyêk xo dir nêberdî. Ma şî şaristanan, cayê ke ma qet nêzanayîne. Awanî, ziwan, kultur û cuye ma rê xerîb bi. Ma feqîr zî bî, nan çinî bi. Bi 28 serrî yo zî m anêmusayê şaristanan. Stenbol de welatijanê ma zaf dejnayî."

	 

	'Wa her kes agêro dewa xo'

	 

	Emîne derheqê cuya şaristanan de wina vat: "Ma şaristanan de perîşan benê, pêro kurdê ma wina yê. Semedê feqîrî kurdê ma muracatê çîyan kenê. Metropolan de nîjadperestîyêk pîl esto. Bi seyan nîjad belkî uca de bibê la tena nîjadperestî vera kurdan yena kerdene. No zî ciwananê ma ser de tesîrêk negatîf kerdêne. Xo bindest û sey nîjadêkê gunehkar dîne. Coka eke merdim zulm vîneno zî serê erdê xo de bo. Merdiş zî û cuye zî serê erdê ma de weş a. Ez veng dana pêro dewijan, wa her kes agêro dewa xo."