'Wa tutî bi ziwanê xo pîl bibê' 

2021-07-10 09:39:29


	 

	Sema Çaglak

	 

	AMED - Cinîyê Amedijî bale antî serê girîngîyê pawitişê ziwanê kurdkî û vatî: "Tutê ma heqê perwerdeyê bi ziwanê kurdkî ra bêpar manenê. Ganî bi taybetî keyeyî hewl bidê ke tutî ziwanê xo yê dayîke xo vîr ra nêkerê. Wa tutî bi ziwanê xo pîl bibê."

	 

	Semedê bidestkerdişê perwerdeyê ziwanê dayîke bi serran o têkoşîn yeno dayene. Bi hemkarîya Torra Ziwan û Kulturê Kurdkî û Platformê Ziwanê Kurdkî  kampanyayêke amebî destpêkerdene. Mîyanê xebatan de tutî zî nêameyî xovîrrakerdene. Rayberîya na xebate zî MED-DER kerd. Rojê vîyarte de MED-DERî dewanê Amedî de şahîya tutan kerd. Keyeyê tutan yê ke tewrê şahî bî, derheqê pawitiş û perwerdeyê bi ziwanê kurdkî de ajansê ma rê qisey kerdî.

	 

	'Ez wazena tutê mi bi kurdkî biciwîyê'

	 

	Nuray Temîz dîyar kerd ke aye tim bi tutanê xo dir kurdkî qisey kena û vat: "Ez şaristanê Yozgatî de bîya û mi qet bi kurdkî nêzanayîne. Dimayê ke tayînê birayê mi ame Amed ez kurdkî musaya. Nika ez nêwazena bi tirkî qisey bikera û hewl dana ke tutê mi tena bi ziwanê xo qisey bikerê û biciwîyê. 5 tutê mi estê û heme bi kurdkî qisey kenê. Mektebî de bi tirkî perwerde vînenê la keye de tirkî qisey nêkenê."

	 

	'Ganî tu tut ziwanê xo xo vîr ra nêkero'

	 

	Hatîbe Temîz zî wina vat: "Xeylêk tutî tena keye de kurdkî qisey kenê. Gama ke şinê teber, dest bi qiseykerdişê tirkî kenê. Semedê perwerdeyîyêk bi ziwanê ma çin o, tutê ma zî heqê perwerdeyî ra bêpar manenê. Ganî tu tut ziwanê xo xo vîr ra nêkero."

	 

	'Semedê tutan ganî mektebê bi kurdkî abibê'

	 

	Songul Aslan zî vat, ganî hem semedê tutan û hem zî semedê cinîyan perwerde bibo û wina dewam kerd: "6 tutê mi estê û ez hewl dana ke ziwanê xo bimusê. Ganî heme keye hewl bido ziwanê xo nêkero xo vîr ra. Ma Mêrdîn ra koçê tîya bî. Semedê ziwanî, dewê ma ameyî vengkerdene. Ma wazenê semedê tutan mektebê kurdkî abibê. No het ra mîsyonê keyeyan xeylêk zaf o. Wa keyeyî ziwanê dayîke titanê xo rê bimusnê. Tena semedê tutan ney, ganî  semedê cinîyan zî perwerdeyê ziwanî bêro dayene. Semedê xeylêk cinî ziwanê kurdkî nêzanêû tutanê xo wina pîl kenê."

	 

	'Nêverdenê ke tutî bi ziwanê xo pîl bibê'

	 

	Fehîme Demîr zî vat, ê kurd ê û ziwanê înan zî kurdî yo û wina qal kerd: "Coka ma mecbûr ê ke bi ziwanê xo xeber bidê. Ma wazenê pêro tutê ma ziwanê dayîke qisey bikerê. Tirkî zî lazim a labelê bê ziwanê dayîke zî nêbeno. La her wext ziwanê m aqedexe kenê û nêverdenê ke tutê ma bi ziwanê xo pîl bibê. La bi ziwanê xo pîl bibê hîna baş beno."

	 

	'Dewan de tutî ziwanê xo xo vîr ra nêkenê'

	 

	Tewr peyîn Eyşan Dogan qisey kerd û vat: "Dewan de tutî ziwanê xo xo vîr ra nêkenê, bi ziwanê xo qisey kenê. La şaristanan de xeylêk tutan êdî ziwanê xo xo vîr ra kerdê. Tîya pêro tutê ma bi kurdkî qisey kenê. Bi kal û pîrikanê xo dir qisey kenê û kurdkî musenê. Ma zî goreyê hêzê xo hewl danê ke qiseykerdişê ziwanê dayîke derûdorê xo de vila bikerê."