'Ez o tim xizmetê ziwanê kurdkî bikera' 

2021-07-08 13:27:07


	 

	 

	Medya Uren

	 

	MÊRDÎN - Şaîre Leyla Yarar (Mazîçînê) ke hemverê tedayê serê ziwanê kurdkî, her tim bi kurdkî nusena û vat: "Ez nuştişê bi ziwanê xo hes kena. Ez o tim xizmetê ziwanê kurdkî bikera."

	 

	Huner, ziwanê hîs û ruhê merdiman o. Cinîyê ke timî hêriş înan rê ameyo kerdene û hemverê nê hêrişî xo ver dayê û bi huner hîsê xo qal kerd. Yew cinîya ke bi beşê hunerî hem edebîyatî hem zî resimî hîsê xo qal kerda Şaîre Leyla Yarar a. Leyla vera astengîyê vejîyayê vernêya ci, hunerê xo bi kurdkî û rengê cinîyan neqş kerda. Ma pîya bibê şahidê huner û serkewtişê ci.

	 

	Bi hezaran resimî xêz kerda 

	 

	Leyla ewro ma kena mêmanê xo bi resimê dest bi pêşkêşê hunerê xo kena. Odaya xo ya ke bi resimê xo xemilnaya nîşanê ma dana. Qat bi qate resiman vejêna. Goreyê ewnîyayîşê ma tewr zêde bi hezaran resimî verê xo de kom kerdê. Xeylêk resimê xo ramojna û pêro resiman de cinî estbî. Leyla ma rê wina qalê cuya xo kerde: "Ez Dêrika Çiyayê Mazî ra ya. Semedê nê mi nameyê xo Mazîçinê kerd. Mi mektebê sereyîn Dêrik de, mektebê orte û amadekarî zî Amed de qedêna. Mi dima ra Îzmîr de beşê Hunerê Weşik qezenc kerd û mi zî qedêna. Ez bîya mamosteya neqşê destan. Mi fek vera da û mi reyna n amadekarîyê îmtihanî kerd. Mi mamostetî û temaşekerdişê tutanê pêşdibistanî kerd. Vernêya ez biba 20 serrî zî mi bi zor dayî zewicnayîş ke nê zêdeyêr ez nêwazena qalê zewacê xo bikera."

	 

	Bi têkoşînê xo bî hunermend 

	 

	Verê wendişê cinîyan hema vaje qet mimkin nêbi. Leyla bi têkoşînê ke daye wina mektebî qedêna. Leyla serrê 2000î de demê ke yewin rey Amed de qursê ziwanê kurdkî ameyî awankerdene, beşdarê qursan bena. Xeylêk nuşteyê Leyla, kovar û rojnameyan de vejîyayê. Resimê ci û nuşteyê ci şayanê xelate yenê vînayene. Serra 2006ine de zî yewin kitabê xo yê bi nameyê Mazîçinê ke bi kurdkî nuşta, çap kena. Mazîçinê sey her rey sere wedarnena û bi xoverdayîşê xo bena wendekar û hunermend.

	 

	'Ez o tim xizmetê ziwanê kurdkî bikera'

	  

	Leyla dîyar kerd ke eşqê aye hunerî qet kêm nêbîyo û vat: "Ma bi çend embazanê bînan dir zî kitab çap kerd. Ez bi nuştiş û resimanê xo beşdar bîya. Ma cuya cinîyan ê koçber mûnabi. Nika zî mi xeylêk şîîrî nuştê. Mi vîrameyîşê çend cinîyan amade kerd û mi xeylêk hîkaye kom kerdê. La ez o senîn kom bikerî û çap bikerî. Nika her çî bîyo pere. Yê ke pereyê înan bibo eşkeno binuso. Ez mabêne de resiman xêz kena. Reyan zî neqşan viraznena. Ez bi nê rengî tu wext fek eşqê xo ra vera nêdana. Xeylêk waştî ma dûr bifînê la nêeşkenê. Nika zî semedê ke ez kurdkî nusena paştdayîş nêdanê. La ez o her wext semedê ziwan û hunerî xizmet bikera. Heta peynîya emrê xo ez o nê dewam bikera."

	 

	'Ganî cinî nêrê astengkerdene'

	 

	Leyla a mabêne de resimêk xêz kena qedêna û dest bi neqşê neweyî kena. Ma Leyla ra persa çira her wext cinîyan xêz kena, kenê û Leyla wina cewab da: "Eke cinî azad bibo do komel zî azad bibo. Coka cinîyî nêrê astengkerdene. Nêwazenê cinî bi xo bihesîyo û sere wedarno. Seke mi rê bîyê asteng pêro cinîyan rê bîyê asteng. Ez vera nê hişmendîyê cinsperestî timî cinîyan xêz kena. Cinî semedê mi hîna bi hizûr a."